عالىمدار بولمە وسىمدىكتەرىنىڭ پايدالى 5 ءتۇرىن اتادى

 استانا. قازاقپارات - بولمە وسىمدىكتەرى اۋانى تازارتىپ قانا قويماي، اعزانى كۇيزەلىستەن ارىلتادى. امەريكا عالىمدارى ارنايى زەرتتەۋ جۇرگىزىپ، ادام اعزاسىنا وڭ اسەرىن تيگىزەتىن بولمە وسىمدىكتەرىنىڭ 5 ءتۇرىن انىقتادى.

 بۇل وسىمدىكتەردەن اللەرگيا سيرەك بولادى ەكەن، دەپ جازادى شەتەلدىك ب ا ق.

1. اعىلشىن شىرماۋىعى. بۇل وسىمدىك اۋانى كومىرقىشقىل گازداردان تازارتۋدان العاشقى ورىنداردا تۇر. اعىلشىن شىرماۋىعى اسىرەسە پاتەردىڭ تومەنگى قاباتتارىندا تۇراتىن نەمەسە جەرتولەدە جۇمىس جاسايتىن ادامدارعا وتە پايدالى.

2. بامبۋك پالماسى. اعىلشىن شىرماۋىعى سۋ مەن كۇن كوزىن جاقسى كورسە، بامبۋك پالماسى ورىن تالعامايدى. ءتىپتى ونى ءجيى سۋارۋدىڭ دا قاجەتى جوق. الايدا بۇل وسىمدىك اۋانى جاقسى تازالايدى. بامبۋك پالماسىن كومپيۋتەردىڭ الدىنا قويساڭىز دا بولادى، سەبەبى ول ەلەكتروماگنيتتىك ساۋلەلەنۋدىڭ زيانىن ازايتادى.

3. سپاتيفيللۋم. بۇل بولمە وسىمدىگى ءۇيىڭىزدىڭ «قارا جۇمىسىنان» ەشقاشان قورىقپايدى. ول ونەركاسىپتىك جانە تۇرمىستىق توكسيندەرمەن كۇرەسەدى. كوپ جاعدايدا سپاتيفيللۋم جاڭا ۇيگە كوشىپ كىرگەن كەزدە نەمەسە جوندەۋ جۇمىستارىن جاساعاننان كەيىن بولمەدە تۇرسا، اۋانى ءتۇرلى حيميكاتتاردان ارىلتادى.

4. پالما لەدي. بۇل وسىمدىك تەك اۋانى تازارتىپ قانا قويماي، سونىمەن بىرگە ونى قاجەتتى مينەرالدارمەن، تۇزدارمەن بايىتادى. ادامنىڭ تىنىس الۋ جۇيەسىنە وڭ اسەرىن تيگىزەدى. بۇنداي وسىمدىكتى سوزىلمالى برونحيت، جۇرەك اۋرۋىمەن اۋىراتىن ادامدار بولمەلەرىندە ۇستاعان ءجون.

سونىمەن قاتار لەدي جۇيكەنى كەرەمەت تىنىشتاندىراتىن قاسيەتكە يە. ا ق ش-تا بۇل بولمە وسىمدىگىن جۇمىسكەرلەر كوبىنەسە كوپ اشۋعا بەرىلمەس ءۇشىن وزدەرىنىڭ باسشىلارىنا ساتىپ الىپ بەرەتىن كورىنەدى.

5. فيكۋس. بۇل بولمە وسىمدىگىنىڭ اۋانى تازارتىپ، جەلدەتەتىن قابىلەتى بار. سونىمەن قاتار مۇلدە اللەرگيا تۋعىزبايدى. سوندىقتان دا بۇنى بالالار بولمەسىنە قويۋعا ابدەن بولادى. عالىمداردىڭ پايىمىنشا، بۇل گۇلدەن بولىنەتىن بيواكتيۆتى زاتتار جاقسى ۇيىقتاپ، سەرگەك تۇرۋعا سەپتىگىن تيگىزەدى.