عالىمدار جوعارى قان قىسىمىن ەمدەۋدىڭ جاڭا ءادىسىن تاپتى
استانا. KAZINFORM — بريتاندىق عالىمدار جوعارى قان قىسىمىن ەمدەۋگە ارنالعان جاڭا پرەپاراتتىڭ تيىمدىلىگىن انىقتادى. زەرتتەۋ ناتيجەسىندە باكسدروستاتتى ۇزاق ۋاقىت قابىلداعان ەرىكتىلەردىڭ 25 پايىزىندا ءدارىنى توقتاتقاننان كەيىن دە قان قىسىمى قالىپتى دەڭگەيدە ساقتالعان. كەيبىر قاتىسۋشىلاردا بۇل اسەر ەكى جىلعا دەيىن جالعاسقان، دەپ حابارلايدى Report.
بۇل تۋرالى لوندونداعى كوروليەۆا مەري ۋنيۆەرسيتەتىنىڭ (QMUL) باسپا ءسوز قىزمەتى حابارلادى.
— باكسدروستاتتىڭ كلينيكالىق سىناعىنا قاتىسقان ەرىكتىلەردىڭ دەنساۋلىعىن قايتا باقىلاۋ بارىسىندا وسىنداي تاڭعالارلىق ءارى كۇتپەگەن ناتيجە انىقتالدى. بۇل بۇيرەك ۇستى بەزدەرىنىڭ شامادان تىس بەلسەندىلىگىمەن بايلانىستى تۇراقتى گيپەرتونياعا شالدىققان ناۋقاستاردىڭ كەم دەگەندە ءبىر بولىگىن وسى مۇشەگە كۇردەلى وتا جاساماي-اق ەمدەۋگە بولاتىنىنا ءۇمىت بەرەدى، — دەدى ا ق ش- تاعى گارۆارد ۋنيۆەرسيتەتىنىڭ پروفەسسورى مەيسون فريمەن.
عالىمدار مۇنداي قورىتىندىعا گيپەرتونيانى ەمدەۋگە ارنالعان باكسدروستات پرەپاراتىنىڭ كلينيكالىق سىناعىنا قاتىسۋشىلاردىڭ دەنساۋلىعىن قوسىمشا باقىلاۋ بارىسىندا كەلگەن. بۇل ءدارى بۇيرەكۇستى بەزدەرىنىڭ قىزمەتى بۇزىلۋىنان تۋىندايتىن جوعارى قان قىسىمىن ەمدەۋگە باعىتتالعان.
باكسدروستات — الدوستەرون گورمونىنىڭ وندىرىلۋىنە جاۋاپ بەرەتىن CYP11B2 فەرمەنتىنىڭ جۇمىسىن تەجەيتىن شاعىن مولەكۋلالى پرەپارات.
بۇل فەرمەنتتىڭ شامادان تىس بەلسەندىلىگى اعزادا سۋ مەن تۇزدىڭ ىركىلۋىنە اكەلەدى. سونىڭ سالدارىنان بەتا- بلوكاتورلار مەن قان قىسىمىن تومەندەتەتىن قولدانىستاعى دارىلەردىڭ كوپشىلىگىنە كونبەيتىن گيپەرتونيانىڭ اۋىر ءتۇرى داميدى.
وتكەن جىلى اياقتالعان كلينيكالىق سىناقتار باكسدروستاتتىڭ الدوستەرون گورمونىنىڭ دەڭگەيىن ەكى ەسە تومەندەتىپ، تاجىريبەگە قاتىسۋشىلاردىڭ 40 پايىزىندا قان قىسىمىن قالىپقا كەلتىرگەنىن كورسەتتى.
ايتا كەتەيىك، عالىمدار قان كەتۋدى لەزدە توقتاتاتىن ۇنتاق ويلاپ شىعاردى.
بۇعان دەيىن قازاقستاندا ءار ەكىنشى ەرەسەك ادام ارتەريالىق گيپەرتونياعا شالدىققانى تۋرالى جازعان بولاتىنبىز.
