بىزدەگى ۇشۋدىڭ قاۋىپسىزدىك دەڭگەيى 82 پايىز - ازاماتتىق اۆياتسيا كوميتەتىنىڭ ءتوراعاسى
ۇكىمەت وتىرىسىنان كەيىن وتكەن باسپا ءسوز ءماسليحاتىندا ازاماتتىق اۆياتسيا كوميتەتىنىڭ ءتوراعاسى تالعات لاستايەۆ ەلدە شەتەلدىك پيلوتتاردىڭ قاپتاپ كەتكەنى تۋرالى سىنعا جاۋاپ بەردى، دەپ حابارلايدى قازاقپارات ءتىلشىسى.

«بىرىنشىدەن، مەن ءوزىم وتاندىق ۇشاقتارمەن ۇشۋدان مۇلدەم قورىقپايمىن. ەكىنشىدەن، الەمدەگى اۋە بايلانىسىنىڭ قاۋىپسىزدىگىن ولشەيتىن كورسەتكىش بار. ول حالىقارالىق ازاماتتىق اۆياتسيا ۇيىمى – ءى س ا و- نىڭ باعاسى. سول باعا بويىنشا بىزدەگى ۇشۋدىڭ قاۋىپسىزدىك دەڭگەيى 82 پايىز. ول ءبىزدىڭ ت م د ەلدەرىنىڭ اراسىندا ەڭ بيىك كورسەتكىش سانالادى. ءتىپتى يسپانيا، چەحيا سياقتى باتىس ەۋروپا مەملەكەتتەرىنىڭ كورسەتكىشتەرىمەن سايكەس. الداعى اۋديتتەن 90 پايىز كورسەتكىشكە جەتۋ دەگەن ماقسات قويىپ وتىرمىز. سوندىقتان بىزدەگى ۇشۋ قاۋىپسىزدىگىنىڭ دەڭگەيى بيىك دەپ ساناۋعا بولادى»، - دەدى كوميتەت باسشىسى.
تالعات لاستايەۆ اسىرەسە «ەير استانا» كومپانياسىندا شەتەلدىك پيلوتتار كوپ ەكەنىن ايتادى.
«جالپى ءبىزدىڭ سالادا 20 مىڭنان استام ادام جۇمىس ىستەيدى. سونىڭ ىشىندە «ەير استانادا» 90-100- ءدىڭ اراسىندا شەتەلدىك پيلوتتار بار. ءبىراق ونىڭ سانى جىل سايىن ازايادى. ويتكەنى بىزدە وتاندىق پيلوتتاردى دايارلايتىن بىرنەشە باعدارلاما بار. ءار اۋە كومپانياسى ءوز پيلوتتارىن وزدەرى دايىنداپ جاتىر. جىل سايىن ءوز ماماندارىمىزدىڭ سانى ءوسىپ جاتىر. ءبىراق اۆياتسيا سالاسىندا شەتەلدىك پيلوتتاردى پايدالانۋ حالىقارالىق پراكتيكا بولىپ ەسەپتەلەدى. سول سەبەپتى ول ەشقانداي ەرەكشە جايداي بولىپ سانالمايدى»، - دەدى كوميتەت ءتوراعاسى.
بۇعان دەيىن بەلگىلى اۆياتور مامان ابىل كەكىلبايەۆ ب ا ق- قا بەرگەن سۇحباتىندا قازاقستاندىق ۇشاقتارمەن ۇشۋدان قورقاتىنىن ايتقان ەدى. ونىڭ سوزىنشە، ەلدەگى بىلىكتى مامانداردىڭ ءبارى اراب ەلدەرىنە كەتىپ، ورنىن شەتەلدەن كەلگەن ماماندار باسىپ جاتىر.
اۆتور
ەسىمجان ناقتىباي