بىزگە شىنايى سەرىكتەستىككە، ءبولىپ-جارماۋعا نەگىزدەلگەن ىنتىماقتاستىق كەرەك - پرەزيدەنت

مەملەكەت باسشىسى سامميتكە قاتىسۋشىلارعا ءىلتيپات ءبىلدىرىپ، قوناقجايلىق تانىتقانى جانە ب ۇ ۇ بيوالۋانتۇرلىلىك بويىنشا كونفەرەنسياسى اياسىنداعى كوشباسشىلار سامميتىن جوعارى دەڭگەيدە ۇيىمداستىرعانى ءۇشىن پرەمەر-مينيستر نيكول پاشينيانعا العىس ايتتى.

پرەزيدەنت تابيعاتتى ساقتاۋ جونىندە كەلەر ۇرپاق الدىندا ورتاق جاۋاپكەرشىلىك پەن حالىقارالىق كۇش-جىگەردى ۇيلەستىرۋ قاجەت ەكەنىن ەسكە سالدى.

- ءبىز تابيعات تارتۋىن بولاشاققا جەتكىزۋدى كوزدەيتىن حالىقارالىق ىنتىماقتاستىقتى كەڭەيتۋ ماقساتىندا جينالىپ وتىرمىز. ياعني كۇردەلى سىن-قاتەرلەرمەن بەتپە-بەت كەلۋى ىقتيمال وسكەلەڭ ۇرپاق الدىنداعى ورتاق جاۋاپكەرشىلىك جونىندە ءسوز قوزعادىق. بۇل - ءبىزدىڭ وركەنيەتىمىزدىڭ امان قالۋىنا دا قاتىستى ماسەلە. ويتكەنى بيوالۋانتۇرلىلىك ادامدار يگىلىگىن، ەكونوميكالىق ورنىقتىلىقتى جانە ۇزاقمەرزىمدى قاۋىپسىزدىكتى قامتاماسىز ەتۋدە وتە قاجەت. بۇلىنبەگەن ەكوجۇيەلەر ازىق-تۇلىك وندىرىسىندە، سۋ رەسۋرستارىن قورعاۋدا جانە ميلليونداعان ادامدى كىرىس كوزىمەن قامتۋدا ماڭىزدى ءرول اتقارادى. شولەيتتەنۋ جانە سۋ تاپشىلىعى، باسقا دا ەكولوگيالىق پروبلەمالار تابيعات پەن ادام اراسىنداعى نازىك تەپە-تەڭدىككە وراسان قاۋىپ توندىرەدى. سۋدىڭ جەتكىلىكسىزدىگى مەن جەردىڭ توزۋى ميلليونداعان ادام ءۇشىن ۇيرەنشىكتى جاعدايعا اينالدى. مۇنىڭ سالدارى تىم اۋىر. سەبەبى بۇل ۇدەرىستەر مەملەكەتتەر اۋماعىنان ارى اسىپ، ورنىقتى دامۋدى تەجەيدى ءارى جاھاندىق تۇراقتىلىققا زاردابىن تيگىزەدى. مۇقيات ويلاستىرىلعان جانە ناقتى شارالاردى قامتيتىن ەكولوگيالىق كۇن ءتارتىبى ساياسي قايشىلىقتاردى ەڭسەرۋى قاجەت. بىزگە شىنايى سەرىكتەستىككە، ءبولىپ-جارماۋعا نەگىزدەلگەن، ەڭ باستىسى، ناقتى ناتيجەلەرگە قول جەتكىزۋدى كوزدەيتىن حالىقارالىق ىنتىماقتاستىق كەرەك، - دەدى قاسىم-جومارت توقايەۆ.

COP17 اياسىنداعى بيوالۋانتۇرلىلىكتى ساقتاۋ بويىنشا كوشباسشىلار سامميتىندە ارمەنيا پرەمەر-مينيسترى نيكول پاشينيان، يران پرەزيدەنتى ماسۋد پەزەشكيان، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، گرۋزيا پرەمەر-ءمينيسترى يراكلي كوباحيدزە، ب ۇ ۇ باس حاتشىسى انتونيۋ گۋتەرريش، يۋنەسكو باس ديرەكتورى حالەد ءال-اناني، زانزيبار پرەزيدەنتى حۋسەين الي مۆيني جانە باسقا دا رەسمي تۇلعالار ءسوز سويلەدى.

وسىعان دەيىن پرەزيدەنت قاسىم-جومارت توقايەۆتىڭ COP17 اياسىنداعى بيوالۋانتۇرلىلىك بويىنشا كوشباسشىلار سامميتىنە قاتىسۋ ءۇشىن ەريەۆانداعى «Meridian Expo and Event» ورتالىعىنا بارعانىن جازدىق.