بىزگە ءجيى سىناتىن ارزان جابدىق قاجەت ەمەس - ەربولات دوسايەۆ مەملەكەتتىك ساتىپ الۋ تۋرالى پىكىر ءبىلدىردى
الماتى. KAZINFORM - الماتى اكىمى ەربولات دوسايەۆتىڭ ناۋرىزباي اۋدانىنىڭ تۇرعىندارىمەن كەزدەسۋى كەزىندە ب ا ق وكىلدەرى اكىمدىك تاراپىنان جۇرگىزىلگەن مەملەكەتتىك ساتىپ الۋ تۋرالى سۇراق قويدى.
- كەشە الماتى مەكتەپتەرىنە اس ءۇي جابدىقتارىن ساتىپ الۋعا بايلانىستى انتيكوردىڭ زەرتتەۋ جۇرگىزگەنى بەلگىلى بولدى. ساتىپ الۋعا بەلگىلەنگەن رەسمي باعا 20 ميلليون بولسا، جابدىقتاردى 60-70 ميلليونعا العالى جاتقان. بىلتىر دا 20 شاقتى مەكتەپكە مۇنداي جابدىقتى العان. بىلتىرعى ساتىپ الۋعا بايلانىستى كىم زەرتتەۋ جۇرگىزەدى جانە جوعارى باعالار ءۇشىن كىم جاۋاپ بەرەدى، - دەدى جۋرناليست.
الماتى اكىمى مەكتەپتەرگە اس ءۇي جابدىقتارىن ساتىپ الۋعا بايلانىستى زەرتتەۋدى سىبايلاس جەمقورلىققا قارسى ءىس- قيمىل اگەنتتىگى قالالىق اكىمشىلىكپەن بىرگە جۇرگىزگەنىن جانە 1,9 ميلليارد تەڭگە بيۋدجەتكە قايتارىلعانىن ايتتى. سونداي-اق ەربولات دوسايەۆ مەملەكەتتىك ساتىپ الۋ جۇيەسىنىڭ كەي تالاپتارىمەن كەلىسپەيتىنىن اتاپ ءوتتى.
- كەشەگى اقپاراتقا بايلانىستى، ءبىز انتيكورمەن بىرگە بۇل جۇمىستى ىستەدىك. ەشتەڭە ساتىپ الىنبادى. ەكىنشىدەن، ۇسىنىلعان 20 ميلليون تەڭگەگە كەلىسپەيمىن. ەگەر وسى جىل ىشىندە ارزان اس ءۇي جابدىعىن الىپ، ول بۇزىلعاندىقتان قايتا جوندەيتىن بولسام، ماعان مەكتەپ ءۇشىن مۇنداي جابدىق قاجەت ەمەس. سوندىقتان مۇنداعى ماسەلە - باعا مەن ساپا تالابىن ورىنداۋ. بىزدە بارلىعى ەڭ ارزان باعادا بولۋى كەرەك تە، سوسىن ءبارى «نەگە سونشا ساپاسىز» دەپ سۇرايدى. ويتكەنى كاسىپكەرلەر ساپاسى تومەن، ەڭ ارزان باعاداعى جابدىقتاردى اكەلەدى. ءبىراق ولار بەلگىلەنگەن تالاپتارعا سايكەس. مەن وسى ەرەجەگە قارسىمىن. مەملەكەت باسشىسى «مەملەكەتتىك ساتىپ الۋ تۋرالى» زاڭعا قول قويدى. ول 2025 -جىلدىڭ 1- قاڭتارىنان باستاپ كۇشىنە ەنەدى. وسى زاڭ بويىنشا كاسىپكەرلەر اكەلگەن تاۋارىنا نە كورسەتكەن قىزمەتىنە جاۋاپ بەرەدى. قازىر وكىنىشكە قاراي، زاڭدا كەمشىلىكتەر بار جانە ونى جوسىقسىز كاسىپكەرلەر پايدالانىپ ءجۇر، - دەدى الماتى اكىمى.
ەسكە سالايىق، بۇعان دەيىن ەربولات دوسايەۆ الماتىداعى قارعالى وزەنىنىڭ اتى وزگەرتۋ تۋرالى سۇراققا جاۋاپ بەرگەن ەدى.
اۆتور
دوسبول اتاجان
