بيىل ەلوردا اكىمدىگى تالاپكەرلەرگە قانشا گرانت بولەدى

استانا. KAZINFORM - بيىل استانادا 14 مىڭ 200-دەن استام تۇلەك مەكتەپ ءبىتىردى. شاھار باسشىسى جەڭىس قاسىمبەك تۇلەكتەردى التىن ۇيامەن قوشتاسۋىمەن قۇتتىقتادى.

- بۇگىنگە دەيىنگى وقۋ جىلدارى ىشىندە وقۋشىلارىمىز مۇعالىمدەرىمەن جانە اتا-انالارىمەن بىرگە وزدەرىنىڭ ەڭ جاقسى قاسيەتتەرىن - جاۋاپكەرشىلىگىن، ءتارتىبىن، بىلىمگە قۇشتارلىعىن كورسەتتى. ەندى تۇلەكتەرىمىز ءۇشىن ومىرىندە جاڭا ءارى جاۋاپتى كەزەڭ باستالادى - ماماندىق پەن جوعارى وقۋ ورنىن تاڭداۋ. ءوز تاراپىمىزدان ءبىز بالالارىمىزدى قولداۋدى ارى قاراي دا جالعاستىرامىز، قالانىڭ ءبىلىم باسقارماسى مەن جۇمىسپەن قامتۋ جانە الەۋمەتتىك قورعاۋ باسقارماسى تاراپىنان جوعارى وقۋ ورىندارىنا 550-دەن استام گرانت ءبولۋ جوسپارلانىپ وتىر. سونداي-اق، ءبىلىم باسقارماسى قالا كوللەدجدەرىنە (9 جانە 11-سىنىپ نەگىزىندە) سۇرانىسقا يە 62 ماماندىق بويىنشا 10 مىڭ گرانت قاراستىرعان، - دەپ جازدى جەڭىس قاسىمبەك Facebook پاراقشاسىندا.

اكىمنىڭ ايتۋىنشا، ەلوردادا وتكەن وقۋ جىلىندا رەكوردتى كولەمدە ءبىلىم بەرۋ مەكەمەسى پايدالانۋعا بەرىلدى، ياعني 24 جاڭا مەكتەپ ىسكە قوسىلدى.

- اتالعان مەكتەپتەر قالادا شامامەن 66 مىڭ وقۋشى ورنىنىڭ (ەكى اۋىسىمدا) اشىلۋىنا مۇمكىندىك بەردى. 24 مەكتەپتىڭ 16-سى «جايلى مەكتەپ» ۇلتتىق جوباسى اياسىندا سالىندى. سونىمەن قاتار، الداعى جىلدارعا دايىندىق جۇمىسىن جالعاستىرىپ جاتىرمىز. جاڭا وقۋ جىلىندا تاعى 15 مەكتەپ اشۋدى جوسپارلاپ وتىرمىز. ءبىلىم بەرۋ نىساندارىن سالۋعا جەكە ينۆەستيتسيالار دا تارتىلىپ جاتىر، - دەيدى قالا باسشىسى.

وسىلايشا، جەڭىس قاسىمبەك جاس تۇلەكتەرگە جاڭا ومىرىنە ساتتىلىك تىلەدى.

ەسكە سالايىق، بۇگىندە ەلىمىزدە نەگىزگى ۇلتتىق ءبىرىڭعاي تەستىلەۋ ءجۇرىپ جاتىر، ول 7 -شىلدەگە دەيىن جالعاسادى.

ايتا كەتسەك، بيىل ەلىمىزدە 217 مىڭ تۇلەك مەكتەپ ءبىتىردى.

اۆتور

داۋلەت ىزتىلەۋ