بيىل جەمقورلاردان تاركىلەنگەن اقشاعا 25 مەكتەپ سالىنادى - ۇكىمەت

жайлы мектеп
Фото: Мухтор Холдорбеков/Kazinform

استانا. KAZINFORM - ەلىمىزدە جەكەمەنشىك مەكتەپتەردىڭ سانى 667-گە جەتتى. بۇل تۋرالى ءماجىلىستىڭ جالپى وتىرىسىندا پرەمەر-ءمينيستردىڭ ورىنباسارى تامارا دۇيسەنوۆا ءمالىم ەتتى.

«اتاپ ايتقاندا، وڭىرلەردە ءبىلىم بەرۋدىڭ ساپاسىن كوتەرۋ، مەكتەپ سالۋ، ينتەرنەتپەن قامتاماسىز ەتۋ جانە بالالاردىڭ قاۋىپسىزدىگى تۋرالى ماسەلەلەر ءجيى كوتەرىلدى. ءبىلىم ساپاسىن كوتەرۋ ماسەلەسى قاراستىرعان ۇلتتىق بايانداما دايارلانىپ، ماماندارمەن جانە وڭىرلەرمەن تولىق تالقىلاندى. وقۋ- اعارتۋ مينيسترلىگىنىڭ اقپاراتىنا سايكەس بۇل تالقىلاۋلارعا 200 مىڭنان اسا مۇعالىم، جوعارى جانە ورتا وقۋ ورىندارىنىڭ وقىتۋشىلارى قاتىستى. وسىعان بايلانىستى وزگەرىستەر جاقىندا وتكەن ۇكىمەت وتىرىسىندا قارالىپ، ءبىلىم سالاسىن دامىتۋ كونتسەپتسيالارىنا ەنگىزىلدى. سالادا اتقارىلار جۇمىستار وتە اۋقىمدى، مينيسترلەر وزدەرىنىڭ جاۋاپتارىندا ولارعا كەڭىنەن توقتالادى»، - دەدى ت. دۇيسەنوۆا.

سونىمەن قاتار ول ءبىلىم ينفراقۇرىلىمىن دامىتۋ باعىتىنا توقتالدى.

«وسىعان وراي اپاتتىق جانە ءۇش اۋىسىمدى مەكتەپتەر ماسەلەسىن جويۋ ماقساتىندا بىرنەشە كوزدەن مەكتەپ سالۋ قولعا الىندى. ونىڭ ءبىرىنشىسى - «جايلى مەكتەپ» اتتى ۇلتتىق جوباسى، ونىڭ اياسىندا 369 مەكتەپ سالىنعالى وتىر. ەكىنشىسى - جەمقورلىق قىلمىستار اياسىندا تاركىلەنىپ، قايتارىلعان قاراجات ەسەبىنەن بىلتىر 36 مەكتەپ سالىنسا، بيىل تاعى 25 مەكتەپ سالىنباق. «اۋىل ەل بەسىگى» باعدارلاماسى جانە جەرگىلىكتى بيۋدجەتتەن 2023 -جىلى 7 مەكتەپ پايدالانۋعا بەرىلسە، بيىل تاعى 6 مەكتەپ سالىنباق»، - دەدى ۆيتسە-پرەمەر.

ونىڭ سوزىنە قاراعاندا، بەلسەندىلىك تانىتىپ كەلە جاتقان قوسىمشا ءبىر باعىت - بۇل بيزنەس ينۆەستيتسيا. بىلتىر 56 جەكەمەنشىك ءبىلىم وشاعى ىسكە قوسىلدى. جالپى، مۇنداي جەكەمەنشىك مەكتەپتەردىڭ سانى بۇگىندە 667-گە جەتتى. وندا 250 مىڭنان اسا بالا ءتالىم الىپ وتىر.

«جالپى، مەكتەپ سالۋ ءۇشىن بارلىق كوزدەردەن بولىنگەن قاراجاتتىڭ 2 جىلدىق سوماسى 2,4 تريلليون تەڭگەنى قۇرادى. سونداي-اق بيىل 270 مەكتەپ كۇردەلى جوندەۋدەن وتكىزىلەدى»، - دەدى تامارا دۇيسەنوۆا.

اۆتور

رۋسلان عابباسوۆ

سوڭعى جاڭالىقتار