بيىل شەگىرتكەمەن كۇرەسكە 8,1 ميلليارد تەڭگە ءبولىندى
استانا. KAZINFORM - بيىل شەگىرتكەمەن كۇرەسكە 8,1 ميلليارد تەڭگە ءبولىندى. بۇل تۋرالى اۋىل شارۋاشىلىعى ءمينيسترى ايداربەك ساپاروۆ ءمالىم ەتتى.
«شەگىرتكەمەن كۇرەسكە ەرەكشە نازار اۋدارۋ كەرەك. بىلتىر تارالۋ اۋماعى ۇلعايعان ەدى، بيىل 2,5 ميلليون گ ا الاڭدا حيميالىق وڭدەۋلەر جۇرگىزۋ جوسپارلانۋدا. وسى جىلى اقتوبە وبلىسىندا 784 مىڭ گەكتار، قوستاناي وبلىسىندا 775 مىڭ گەكتار جانە تۇركىستان وبلىسىندا 272 مىڭ گەكتار الاڭدا شەگىرتكە تارالادى دەپ كۇتىلىپ وتىر. قازىرگى كەزدە كۇرەسكە قاجەتتى بارلىق رەسۋرس بار»، - دەپ سەندىردى ايداربەك ساپاروۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.
ونىڭ ايتۋىنشا، شەگىرتكەلەرمەن كۇرەسۋ ءۇشىن پەستيتسيدتەر قورى ساتىپ الىندى.
«بيىل ءۇيىرلى شەگىرتكەمەن كۇرەسۋگە رەسپۋبليكالىق بيۋدجەتتەن 8,1 ميلليارد تەڭگە ءبولىندى. وڭدەۋ جۇمىستارىن جۇرگىزۋ ءۇشىن قاجەتتى تەحنيكالار جەتكىلىكتى. سونىمەن قاتار شەكارا ماڭىنداعى اۋماقتاردا شەگىرتكەلەر جاعدايى قاداعالاۋىمىزدا بولادى. وتكەن جىلعى جاعداي قايتالانباۋى ءۇشىن اكىمدىكتەر شەگىرتكەگە قارسى كۇرەس ماسەلەلەرىنە وتە مۇقيات جانە جاۋاپكەرشىلىكپەن قاراۋى كەرەك»، - دەيدى ۆەدومستۆو باسشىسى.
اۆتور
داۋلەت ىزتىلەۋ
