بيىل ChatGPT چاتى قازاق تىلىندە ىسكە قوسىلادى
استانا. KAZINFORM - قازىر اتالعان چاتتى قازاق تىلىندە قولجەتىمدى ەتۋ باعىتىندا جۇمىستار ءجۇرىپ جاتىر. بۇل تۋرالى سيفرلىق دامۋ، يننوۆاتسيالار جانە ايروعارىش ونەركاسىبى ءمينيسترى جاسلان ماديەۆ ءمالىم ەتتى.
«ارينە، ول وتە ماڭىزدى جوبا. ءبىز QazLLM دەگەن جوبانى ىسكە اسىرىپ جاتىرمىز، ول قازاق تىلىندەگى ۇلكەن تىلدىك مودەل. قازىرگى تاڭدا نازاربايەۆ ۋنيۆەرسيتەتىمەن وسى باعىتتا جۇمىس ىستەپ جاتىرمىز. توكەندەردى جيناپ جاتىرمىز، قازىرگى ۋاقىتتا 6 ميللياردقا جۋىق توكەن جينالدى. ءبىزدىڭ ماقسات، جىل سوڭىنا دەيىن 100 ميلليارد توكەن جيناۋ. بيىل جەلتوقساندا ءبىرىنشى نۇسقاسى شىعادى دەپ وتىرمىز»، - دەدى جاسلان ماديەۆ ۆەدومستۆودا وتكەن باسپا ءسوز ءماسليحاتىندا.
ەسكە سالا كەتەيىك، بيىل اقپاندا قازاقستاندا ChatGPT چاتىنىڭ بالاماسى جاسالاتىنى تۋرالى حابارلاعان ەدىك.
Chat GPT - تۇتىنۋشىلارعا ينتەللەكتۋالدى جانە جەكە قىزمەت كورسەتۋدى ۇسىناتىن قازاقستانداعى جانە باسقا ەلدەردەگى جەتەكشى چاتبوت. ChatGPT چات- بوتىنىڭ وتاندىق انالوگى ۇلكەن كولەمدەگى دەرەكتەردى تالداپ، سۇراقتارعا جاۋاپ بەرەدى، ءماتىن قۇرايدى، سونىمەن قاتار قازاق ءتىلىنىڭ بارلىق مورفولوگيالىق جانە سينتاكسيستىك ەرەجەسىن بىلەدى. بۇل چات- بوتپەن سويلەسىپ وتىرىپ، ءسىز ونى شىنايى ادام ەكەن دەپ ويلاپ قالاسىز.
«ءبىز قازاق تىلىندە ءبىرىنشى ءىرى LLM ءتىل ۇلگىسىن جاسادىق. جۇيە نەيروندىق جەلى ارحيتەكتۋراسى نەگىزىندە قازاق تىلىندەگى كەز كەلگەن ءماتىندى تۇسىنۋگە جانە ءوز بىلىمىنە سايكەس جاۋاپ بەرۋگە قابىلەتتى. ءبىزدىڭ ChatGPT پروتوتيپىمىز قازاق ءتىلىنىڭ ەرەجەسىن ءتۇسىنىپ، ارىپتەر مەن بۋىندار، سوزدەر مەن سويلەمدەر اراسىنداعى بارلىق تىزبەكتى ەستە ساقتايدى. سونىمەن بىرگە سينتاكسيستىك جانە گرامماتيكالىق تۇرعىدان دۇرىس ءارى پايدالانۋشىنىڭ سۇرانىسىنا ساي كەلەتىن دارەجەدە جاۋاپ بەرەدى»، دەدى «جاساندى ينتەللەكت» عىلىمي زەرتتەۋ ينستيتۋتىنىڭ ديرەكتورى الىبەك بارلىبايەۆ.
عالىمدار اتالعان جۇيەگە ادەبي شىعارمالار، نورماتيۆتىك قۇجاتتامالار مەن عىلىمي ماتەريالداردى دايىنداۋ بويىنشا تاجىريبە جۇرگىزگەن. ەندى ولار جاساندى ينتەللەكت مودەلىن ءبىلىم بەرۋ ۇردىسىنە قولدانۋدى ۇسىنباق. چات- بوتتىڭ ءبىلىمىن قاجەتتى اقپاراتتى ناقتىلاۋ ءۇشىن پايدالانۋعا بولادى.
«مەكتەپ وقۋشىلارى ەمتيحانعا دايىندالعاندا تەستەگى كەيبىر اقپاراتتى، ماسەلەن، ماتەماتيكا تەڭدەۋى نەمەسە حيمياداعى تەرميندى تۇسىنبەدى دەلىك. ولار ونى وزدەرى ناقتىلاعىسى كەلەدى. ءبىراق قاسىندا مۇعالىم بولمايدى. سونداي كەزدە بالالار جۇيەگە سۇراق قويىپ، تەز جانە قىسقا جاۋاپ الادى. سودان كەيىن قوسىمشا سۇراق قويا الادى. بۇل تەحنولوگيانى جالپى ءبىلىم بەرەتىن كۋرستاردى ءجيى وقيتىن باستاپقى كۋرستاردىڭ ستۋدەنتتەرىنە دە پايدالانۋعا بولادى»، دەدى PhD دوكتورى ءا. بارلىبايەۆ.
اۆتور
داۋلەت ىزتىلەۋ
