بيىل ءۇش مىڭعا جۋىق قانداس قازاقستان ۋنيۆەرسيتەتتەرىنە قابىلداندى
استانا. قازاقپارات - بيىل ەل ۋنيۆەرسيتەتتەرىنە 3 مىڭعا جۋىق قانداس قابىلداندى. ولارعا جىل سايىن بولىنەتىن مەملەكەتتىك گرانتتىڭ 4 پايىزى بەرىلەدى. بۇدان بولەك 1,5 مىڭعا جۋىق جاس فاۋندەيشن كۋرستارىندا ءبىلىم الىپ جاتىر.
قانداستار ەۋرازيا ۇلتتىق ۋنيۆەرسيتەتىندە باس قوسىپ، «وتانداستار» جاستار فورۋمىنا قاتىستى. ستۋدەنتتەرگە قازاقستانداعى ءبىلىم الۋ، جۇمىسقا ورنالاسۋ جانە كاسىبي تۇرعىدا ءوسۋ مۇمكىندىكتەرى تانىستىرىلدى. اشىق ديالوگ پەن موتيۆاتسيالىق كەزدەسۋلەر ارقىلى قانداس ستۋدەنتتەردىڭ الەۋەتىن ارتتىرۋ، قوعامعا بەيىمدەلۋىنە جانە بولاشاقتا كاسىبىن تاڭداۋعا قولداۋ كورسەتۋ كوزدەلگەن.
ابزال تالتەنوۆ، ل. ن. گۋميليەۆ اتىنداعى ە ۇ ۋ ستراتەگيالىق دامۋ جانە ينتەرناتسيونالداندىرۋ جونىندەگى پرورەكتورىنىڭ م. ا.:
- قانداستارىمىز ەڭ كوپ شوعىرلانعان - ول ءبىزدىڭ ۋنيۆەرسيتەت. مىڭ جەتى جۇزگە تارتا باۋىرلارىمىز بىزدە ءبىلىم الىپ جاتىر. باكالاۆر، ونى بىتىرگەننەن كەيىن شامامەن 30 پايىزى ماگيستراتۋرادا وقيدى. 20 شاقتى بالا دوكتورانتۋرادا وقىپ جاتىر. بۇل بالالارىمىزعا ەلىمىزدىڭ ءوزى وتە جاقسى قامقورلىق كورسەتىپ، وتە ۇلكەن جاعدايلار تۋعىزىپ بەرىپ وتىر. گرانتتارعا ءتۇسۋ، دايىندىققا ءتۇسۋ، وقۋعا تۇسۋدەگى جەڭىلدىكتەر.
ىرىسقالي داۋرەنبەك، وتانداستار قورى پرەزيدەنتى:
- كەلىپ جاتقان جاستار موڭعوليادان، قىتايدان، وزبەكستاننان، رەسەيدەن كەلەدى. ولاردىڭ دا ءوز ەلدەرىندە جوعارى وقۋ ورىندارى بار. ءبىراق سوعان قاراماستان ولار قازاقستانعا كەلىپ وقۋى ونىڭ ءوزى، مەنىڭ ويىمشا، ولاردىڭ بولاشاعى تۋرالى ويلاعاندارى. ويتكەنى ولار قازاقستانعا كەلىپ ءبىلىم السا، وسى جەردە قالۋ ماقساتىمەن جول تاۋىپ ىزدەنىپ جاتقانى.
24.kz
