بيىل ارال تەڭىزىنە 1,38 ميلليارد تەكشە مەتر سۋ كەلدى
استانا. KAZINFORM - سۋ رەسۋرستارى جانە يرريگاتسيا ءمينيسترى سولتۇستىك ارالدى قالپىنا كەلتىرۋ جوباسىنىڭ ەكىنشى كەزەڭىنە دايىندىق بويىنشا كەڭەس وتكىزدى.
حالىقارالىق ارالدى قۇتقارۋ قورىنىڭ قازاقستانداعى اتقارۋشى ديرەكتسياسىنىڭ كەڭسەسىندە وتكەن كەزدەسۋگە ح ا ق ق ساراپشىلارى مەن جوبانى ازىرلەۋشى ماماندار قاتىستى.
مينيستر جوبانىڭ تەحنيكالىق- ەكونوميكالىق نەگىزدەمەسىن ازىرلەۋ بارىسى جانە سولتۇستىك ارال تەڭىزىندەگى سۋ رەسۋرستارىن ۇلعايتۋ جانە تۇراقتاندىرۋ جۇمىسىمەن تانىستى.
ءبىرىنشى باعىت تەڭىزدە جانە وعان جاقىن ايماقتا بالىق اۋلاۋ مەن سۋ ورتاسىنىڭ جاعدايىن جاقسارتۋدى، سونداي-اق سىرداريا وزەنىنىڭ اتىرابىنداعى سۋلى-باتپاقتى جەرلەردى تۇراقتاندىرۋدى كوزدەيدى.
سۋ ينفراقۇرىلىمى جەتىلدىرىلىپ، سولتۇستىك ارال مەن سىرداريا اتىرابىنداعى گيدرولوگيالىق جاعدايى جاقسارادى.
ەكىنشى باعىت - قىزىلوردا وبلىسىندا بالىق شارۋاشىلىعىن، مال شارۋاشىلىعىن، تۋريزمدى جانە ورمان وتىرعىزۋدى دامىتۋ ارقىلى ورنىقتى ەكونوميكالىق، الەۋمەتتىك جانە ەكولوگيالىق قىزمەتتى قولداۋ.
ءۇشىنشى باعىتتا ارال- سىرداريا باسسەينىندە سۋ رەسۋرستارىن باسقارۋ جۇيەسى جاقسارادى دەپ كۇتىلىپ وتىر.
كەزدەسۋ قورىتىندىسى بويىنشا مينيستر ت ە ن- ءدى مەرزىمىنەن كەشىكتىرمەي ازىرلەۋ جونىندە ءبىرقاتار ۇسىنىس ايتتى، سونداي- اق ارال ايماعىندا جوباعا قاتىستى قوعامدىق تىڭداۋ وتكىزۋدى تاپسىردى.
«ازىرلەنىپ جاتقان جوبا - سىرداريا وزەنىنىڭ ارناسىن رەتتەۋ جانە سولتۇستىك ارالدى ساقتاۋ جونىندەگى اۋقىمدى جوبانىڭ جالعاسى. ول 2002-2010 -جىلدار ارالىعىندا ىسكە اسىپ، بۇكىل ارال وڭىرىنە وڭ اسەرىن تيگىزدى. ەكىنشى كەزەڭ سولتۇستىك ارالدى تۇراقتى سۋمەن قامتاماسىز ەتۋدەن باستاپ ەكونوميكالىق جانە الەۋمەتتىك جوبالاردى دامىتۋعا دەيىنگى ءتۇرلى باعىتتاردى قامتيدى»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
ەستەرىڭىزگە سالا كەتەيىك، 2024 -جىلدىڭ باسىنان باستاپ سولتۇستىك ارال تەڭىزىنە 1,38 ميلليارد تەكشە مەتر سۋ كەلدى.
