بيىل الەمدە بيداي قىمباتتايدى

استانا. قازاقپارات- بيىل الەمدە بيداي باعاسى قىمباتتاپ، ءونىم كولەمى %6- كە تومەندەۋى مۇمكىن، دەپ حابارلايدى 24kz.

«باعانىڭ وسۋىنە رەسەيدە مامىر ايىندا ءجۇرىپ وتكەن اياز سەبەپ»، - دەيدى، الەمدىك ساراپشىلار. رەسەي - بۇگىندە الەمدەگى ەڭ ءىرى بيداي ءوندىرۋشى ەل. سول سەبەپتى ونىڭ ىشكى نارىعىنداعى وزگەرىستەر، الەمدىك باعالارعا ءوز اسەرىن تيگىزەرى ءسوزسىز. تەك رەسەي ەمەس، اۋا رايىنىڭ قولايسىزدىعىنان باسقا ەلدەردەگى جاعداي كۇردەلەنە تۇسكەن.

بيىل رەسەيدە ەگىن بىتىك شىقپايدى

الەمدە ەڭ ءىرى استىق ەكسپورتتاۋشى رەسەيدە بيىل شارۋانىڭ جايى ءماز ەمەس. اۋا رايىنىڭ قولايسىزدىعىنان بيداي بىتىك شىقپاي جاتىر. كوكتەمدە كورسەتكىش 94 ميلليون تونناعا جەتۋى كەرەك ەدى. الايدا، بىرىككەن ۇلتتار ۇيىمىنىڭ ازىق-تۇلىك جانە اۋىل شارۋاشىلىعى ۇيىمى «بيىل كورشى ەل استىقتى 10 ميلليون تونناعا از باستىرۋى مۇمكىن»، دەيدى. وعان سەبەپ - كوكتەمگى الاپات سۋ تاسقىنى. ول ازداي، مامىردا كۇتپەگەن جەردەن كۇن سۋىتىپ، ۇسىك شالىپ، ءبىراز ءونىم بۇلىنگەن. ال، رەسەيدىڭ ءوزى بيىل 132 ميلليون توننا استىق جيناۋعا نيەتتى. بۇل كورسەتكىش كەيىنگى 2 جىلمەن سالىستىرعاندا الدەقايدا از.

ماسەلەن، 2022 -جىلى 158 ميلليون، ال بىلتىر 145 ميلليون توننا استىق جينالعان. روستوۆ وبلىسىنىڭ شارۋالارى بولسا، بيىل قۋاڭشىلىقتان ونىمدىلىك ادەتتەگىدەن %40- كە از بولادى دەپ ەسكەرتىپ وتىر.

سەرگەي ساسۋنوۆ، «راسسۆەت» شارۋا قوجالىعىنىڭ باس اگرونومى:

- كەيىنگى 10 كۇندە سىناپ باعاناسى 50 گرادۋستان تۇسەر ەمەس. سوعان قاراماستان، استىق جيناۋ ماۋسىمىندا بارىنشا ءونىم الامىز دەگەن ءۇمىت بار. دەگەنمەن، كورسەتكىش وتكەن جىلدارداعىداي جوعارى بولمايدى.