بيىل 500 اسكەري قىزمەتشى شەتەلگە وقۋعا جىبەرىلدى
استانا. قازاقپارات - 2024-جىلى 500-دەن استام اسكەري قىزمەتشى شەتەلدىك اسكەري جوعارى وقۋ ورىندارى مەن وقۋ ورتالىقتارىنا وقۋعا جىبەرىلدى، دەپ حابارلايدى 24KZ.
بۇل ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ اسكەريلەردى دايارلاۋ تۋرالى كەلىسىمى اياسىندا ىسكە استى. سونداي-اق ەكىجاقتى حالىقارالىق شارتتار شەڭبەرىندە شەت مەملەكەتتەردىڭ جوعارى وقۋ ورىندارىنا 390 اسكەري قىزمەتشى وقۋعا جىبەرىلدى. 2024 -جىلى قازاقستاندا اسكەري وقۋ ورىندارىن جاڭعىرتۋ جالعاسىپ، قارۋلى كۇشتەرگە ارنالعان كادر دايارلىعىن جاقسارتۋعا مۇمكىندىك بەردى. اسكەري مامانداردى دايارلاۋدىڭ وقۋ جوسپارلارى مەن باعدارلامالارى قايتا قارالدى.
مىسالى، راديوەلەكترونيكا جانە بايلانىس اسكەري- ينجەنەرلىك ينستيتۋتىنداعى وقۋ قارقىنى ۇدەپ، 5 جىلدان 4 جىلعا دەيىن قىسقاردى.
امانگەلدى توگىسوۆ، ق ر ق م اسكەري ءبىلىم جانە عىلىم دەپارتامەنتى باستىعىنىڭ ورىنباسارى:
- كۋرسانتتاردىڭ اسكەري پراكتيكادان ءوتۋ ۋاقىتى ۇزارتىلدى. ۇلتتىق قورعانىس ۋنيۆەرسيتەتىندە جۇمىلدىرۋ دايىندىعى فاكۋلتەتى اشىلىپ، وندا جوعارى بىلىكتى مۇعالىمدەر، ءتۇرلى مەملەكەتتىك ورگاندار ماماندارىن دايىنداپ جاتىر. قۇرلىق اسكەرلەرىنىڭ اسكەري ينستيتۋتىندا ءبىتىرۋشى كۋرسانتتارعا كوشباسشىلىق قاسيەتتەردى دامىتۋعا، نۇسقاۋشى- ادىستەمەلىك داعدىلاردى جەتىلدىرۋگە، بولاشاق وفيتسەرلەردىڭ كاسىبي شەبەرلىگى مەن فيزيكالىق دەڭگەيىن ارتتىرۋعا باعىتتالعان «ساردار» كۋرسى ەنگىزىلدى.
