بىرىككەن اراب امىرلىكتەرىندە جانارماي باعاسى قانشا؟

استانا. قازاقپارات - مۇنايدىڭ ورداسى اراب ەلدەرىندە جانارماي باعاسى قانشا؟ بىرىككەن اراب امىرلىكتەرى دەگەندە ەڭ الدىمەن ويعا قارا التىن ورالاتىنى راس. سونىڭ يگىلىگى بولسا كەرەك، ءبىر كەزدەرى شاعىل ءھام بارقان قۇمعا ورانىپ جاتقان قالالار بۇگىندە ساۋلەتى مەن داۋلەتى كەلىسكەن مەكەنگە اينالدى.

бензин
Фото: pixabay.com

ال مۇنايدىڭ نەگىزگى ءونىمى جانار-جاعارمايعا كەلسەك، ونىڭ قۇنى ەلدە اي سايىن وزگەرىپ تۇرادى. جەرگىلىكتى جۇرتتى بىلتىر سول جاعداي قيناپ، كوكەيدە كوپ ساۋال تۋىنداتقان. بەنزين ءبىر عانا ساتتە %30- كە قىمباتتاپ، قاراپايىم حالىق پەن بيزنەس ءبىراز زارداپ شەككەن.

مۇحاماد گۋفران، ابۋ- دابي تۇرعىنى:

- ۇكىمەت كەلەر ايدىڭ باعاسىن ازىرگە جاريالامادى. تاياۋ كۇندەرى بەلگىلى بولاتىن شىعار. ءبىر انىعى، بۇرىنعى كەزبەن سالىستىرعاندا قىمبات. ايتالىق، ون شاقتى جىل بۇرىن جانارمايدى 1 ديرحامعا ساتىپ الۋشى ەدىم. قازىر ول سوما ەكى ەسەدەن دە اسىپ كەتتى. بىلتىر مامىر ايىندا بولعان جاعداي ءالى ەسىمدە. باعا ءبىر ايدىڭ ىشىندە شارىقتاپ شىعا كەلدى. الايدا كەيىن احۋالعا ۇكىمەت ارالاسقان. سودان سوڭ باعا ءبىرشاما ارزانداعان.

دەگەنمەن، قازىر جاعدايدىڭ قايتالانۋى مۇمكىن ەكەنى جوققا شىعارىلىپ جاتقان جوق. مۇندا دا مۇناي وندىرىسىندەگى كوپ دۇنيەنى نارىق قاتىسۋشىلارى رەتتەيدى.

ايتا كەتكەن ءجون، امىرلىكتىڭ جانارماي قۇنىنا جاۋاپتى كوميتەتى جەلتوقسان جانە قاڭتار ايلارىنا ارنالعان باعانى وزگەرىسسىز قالدىردى. وسى كۇنى جانارماي قۇيۋ بەكەتتەرىندە كوپشىلىك كوپ قولداناتىن Special-95 ماركالى بەنزين ءبىزدىڭ اقشاعا شاققاندا 352 تەڭگەگە ساۋدالانىپ جاتىر.

وزبەكستاندا بەنزين باعاسىن جانارماي قۇيۋ ستانسيالارى بەلگىلەيدى

وسى ايدا قازاقستاننان وزبەكستانعا جەر استىمەن زاڭسىز بەنزين تاسمالداعان ەكى بىردەي ۇيىمداسقان توپ ۇستالدى.

كۇدىكتىلەر كۇنىنە 6-7 توننا جانارمايدى كورشى ەلگە قۇبىر ارقىلى جونەلتىپ وتىرعان. بىزدەگى ارزان دۇنيەنى وزگەلەر، وسىلايشا، ءتۇرلى جولدارمەن تاسىپ جاتىر. جالپى وزبەكستاندا بەنزين باعاسى بىزگە قاراعاندا ەكى جارىم ەسە قىمبات. سوندىقتان الىگدەي زاڭسىز ارەكەتتەر شەكارا بويىندا ءجيى بولادى.

وزبەكستاندا ا ي-80 بەنزينى جۇرگىزۋشىلەر اراسىندا جوعارى سۇرانىسقا يە. ساپاسى تومەن بولعانىمەن، باعاسى قولجەتىمدى. جانارماي بەكەتتەرىندە ول 8307 سۋم، ياعني، ءبىزدىڭ اقشاعا شاققاندا 331 تەڭگەدەن ساتىلادى. ال ا ي-92-ءنىڭ باعاسى 435 تەڭگەگە تەڭ. جوعارعى ساپالى ا ي-98- ءدىڭ قۇنى ءبىزدىڭ ۆاليۋتامەن 657 تەڭگەگە دەيىن بارادى.

ءبىر قىزىعى، بۇل ەلدە جانارماي بەكەتتەرى بيرجاعا وزدەرى قاتىسىپ، ولارعا قۇندى بەلگىلەۋ قۇزىرەتى بەرىلگەن. مەملەكەت باعا ساياساتىنا ارالاسپايدى. ەلدىڭ ەنەرگەتيكا مينيسترلىگى 2020 -جىلى بەنزيندى ەركىن ساۋداعا جىبەرگەن. البەتتە جانارماي بەكەتتەرى ويىنا كەلگەن باعانى قويا المايدى. ويتكەنى باسەكەلەستىك جوعارى. ديزەلدىڭ قۇنى تاشكەنتتە ليترى 358 تەڭگەدەن باستالىپ، كەيبىر بەكەتتەردە 498 تەڭگە كولەمىندە ساۋدالانادى.

ايتا كەتۋ كەرەك، وزبەكستاندا ا ي-80 بەنزينى جىل سوڭىنا دەيىن ساتىلىمنان شىعارىلادى. الا شاپاندى اعايىندار ەۋرو-4 ەكولوگيالىق ستاندارتىنا ءوتۋ ءۇشىن وسىنداي قادامعا بارىپ وتىر. و باستا ەۋرو-4 ستاندارتىنا كورشى ەل 2028 -جىلى اۋىسۋى كەرەكتى. الايدا ەلدەگى ەكولوگيالىق احۋال مەن جاسىل ەكونوميكاعا باسىمدىق بەرىلگەننەن كەيىن باعدارلاما جەدەلدەتىلدى. ەگەر ا ي-80 ساتىلىمنان شىعارىلسا، جۇرگىزۋشىلەردىڭ قالتاسى قاعىلارى انىق. ەلدە كوپ كولىك گازبەن جۇرەتىنىن دە ەسكەرۋ كەرەك. الايدا سالىستىرمالى تۇردە قاراساق، مەتاننىڭ دا باعاسى اناۋ ايتقانداي ارزان ەمەس. ليترى 157 تەڭگەدەن ساتىلادى. كورشى ەلدەگى جانارماي باعامى وسىنداي. ەگەر وزبەكستانعا كولىكپەن ساياحاتتاۋعا نيەتتەنسەڭىز، مۇنداعى بەنزين باعاسىنىڭ جوعارى ەكەنىن ەسكەرگەنىڭىز ءجون.

رەسەي بەنزيننىڭ قولجەتىمدىلىگى بويىنشا ەۋروپالىق رەيتينگتە 15-ورىندا تۇر

كەيىنگى ەكى جىلدا كورشى ەل ەكسپورتقا توسقاۋىل قويۋ نەمەسە وسى تىيىمدى الىپ تاستاۋ ارقىلى جانارماي باعاسىن تۇراقتاندىرۋعا تىرىسىپ كەلەدى. ءبىراق وعان قاراماستان بەنزين مەن ديزەل وتىنى قىمباتتاپ جاتىر.

رەسەيدە ءبىر ليتر جانارمايدىڭ ورتاشا قۇنى - 60 رۋبل. بۇل شامامەن 312 تەڭگە. بەنزيننىڭ قولجەتىمدىلىگىن قامتۋ ءۇشىن حالىقتىڭ تابىسى ەسكەرىلگەن. زەرتتەۋ ناتيجەلەرىنە سۇيەنسەك، رەسەي ازاماتى ورتاشا ايلىق جالاقىسىنا شامامەن 1240 ليتر بەنزين ساتىپ الا الادى.

24.kz

سوڭعى جاڭالىقتار