بىرىككەن اراب امىرلىكتەرى نەكە الدىندا مىندەتتى گەنەتيكالىق تەستىلەۋدى ەنگىزەدى
استانا. KAZINFORM - قابىلدانعان شارالار ۇلتتىق گەنەتيكالىق دەرەكقوردى قۇرۋمەن بىرگە گەنەتيكالىق اۋرۋلاردى الدىن الا انىقتاۋعا مۇمكىندىك بەرەدى، دەپ حابارلايدى Kazinform ءتىلشىسى.
2025 -جىلدىڭ 1- قاڭتارىنان باستاپ بىرىككەن اراب امىرلىكتەرىنىڭ بارلىق ازاماتى ءۇشىن نەكە الدىنداعى گەنەتيكالىق تەستىلەۋ مىندەتتى بولدى. مۇنداي شەشىم ەل تۇرعىندارىنىڭ اراسىندا گەنەتيكالىق اۋىتقۋلاردىڭ كەڭ تارالۋىنا بايلانىستى قابىلدانعان. بۇل ءارى ايماقتىڭ تاريحي-مادەني ەرەكشەلىكتەرىنە بايلانىستى بولىپ وتىر.
بۇرىن نەكەگە تۇرار الدىندا گەنەتيكالىق تەستىلەۋ مىندەتتى ەمەس ەدى، ول تەك ازاماتتار ءۇشىن دە، شەتەلدىكتەر ءۇشىن دە نەكە الدىنداعى مەديتسينالىق تەكسەرۋدەن ءوتۋى قاجەت بولاتىن. ەندى گەنەتيكالىق تەستىلەۋ نەكەگە تۇرۋعا نيەت بىلدىرگەن ب ا ءا ازاماتتارى ءۇشىن مىندەتتى نەكەگە دەيىنگى سكرينينگ باعدارلاماسىنىڭ ءبىر بولىگى بولادى. بۇل شەشىمدى ب ا ءا ۇكىمەتىنىڭ قاراشا ايىندا وتكەن جىل سايىنعى وتىرىستارىندا ماقۇلداعان امىرلىكتەردىڭ گەنومدىق كەڭەسى قابىلدادى.
- گەنەتيكالىق تەستىلەۋ كارديوميوپاتيا، گەنەتيكالىق ەپيلەپسيا، ومىرتقا بۇلشىق ەتىنىڭ اتروفياسى، ەستۋ قابىلەتىنىڭ جوعالۋى، مۋكوۆيستسيدوز جانە «ەمدەلۋى قيىن باسقا دا اۋىر جانە سوزىلمالى اۋرۋلار» سياقتى 840-قا جۋىق تۇقىم قۋالايتىن اۋرۋلاردى تۋدىرۋى مۇمكىن 570-تەن استام گەنەتيكالىق مۋتاتسيالاردى انىقتايدى، - دەدى WAM.
تەستىلەۋ ەرلى-زايىپتىلارعا وتباسىن جوسپارلاۋ كەزىندە دەنساۋلىقتارى تۋرالى نەگىزدەلگەن شەشىم قابىلداۋعا مۇمكىندىك بەرەدى.
ستراتەگيا ەرتە مەديتسينالىق ارالاسۋدى جەڭىلدەتىپ، ەميراتتار اراسىندا گەنەتيكالىق اۋرۋلاردى ەرتە انىقتاۋعا كومەكتەسەتىن بىرىكتىرىلگەن ۇلتتىق گەنەتيكالىق دەرەكقوردى قۇرۋعا باعىتتالعان.
دەنساۋلىق ساقتاۋ جانە الدىن الۋ مينيسترلىگى بۇل شەشىم ب ا ءا 2071 Centennial Vision باعدارلاماسىنا سايكەس تۇراقتى دامۋعا قول جەتكىزۋ جانە ءومىر ساپاسىن جاقسارتۋ ءۇشىن بولاشاق تەحنولوگيالاردى قولدانا وتىرىپ، دەنساۋلىق ساقتاۋ سالاسىنداعى ترانسفورماتسيالىق وزگەرىستەرگە ىقپال ەتەتىنىن اتاپ ءوتتى.
باسقارما گەنەتيكالىق تەستىلەۋدى ەنگىزۋ بويىنشا باسقا دا مەملەكەتتىك ورگاندارمەن بىرلەسىپ جۇمىس ىستەيتىن بولادى.
2022 -جىلى ءابۋ-دابيدە 800-دەن استام جۇپ قاتىسقان ەميرات گەنوم باعدارلاماسىنىڭ پيلوتتىق كەزەڭى باستالدى. وسى زەرتتەۋگە سايكەس، گەنەتيكالىق ۇيلەسىمدىلىككە %86 جاعدايدا قول جەتكىزىلدى. ال گەنەتيكالىق ناتيجەلەرگە نەگىزدەلگەن %14 جاعدايدا قوسىمشا ارالاسۋ جانە وتباسىن جوسپارلاۋ قاجەت بولدى.
مەديتسينالىق ساراپشىلار سول كەزدە سكرينينگتىك ستراتەگيا ب ا ءا ازاماتتارىنىڭ دەنساۋلىعى مەن ءال-اۋقاتىن قورعاۋدىڭ كىلتى ەكەنىن ايتتى. كەيىننەن ءابۋ-دابي دەنساۋلىق ساقتاۋ دەپارتامەنتى گەنەتيكالىق تەستىلەۋدى نەكەگە دەيىنگى سكرينينگ باعدارلاماسىنىڭ نەگىزگى ەلەمەنتى رەتىندە ەنگىزدى.
ءابۋ-دابيدەگى M42 مەديتسينالىق تەحنولوگيالىق كومپانياسىنىڭ باس وپەراتسيالىق ديرەكتورىنىڭ ورىنباسارى دوكتور فاحەد ءال-مارزۋكي The National News-كە گەنەتيكالىق تەستىلەۋ امىرلىك تۇرعىندارى اراسىندا ەڭ كوپ تارالعان اۋرۋلاردى انىقتاۋ ءۇشىن ماڭىزدى ەكەنىن ايتتى.
- بۇل ب ا ءا- دە امىرلىك تۇرعىندارى اراسىندا گەنەتيكالىق بۇزىلۋلاردىڭ جوعارى تارالۋىنا بايلانىستى وتە ماڭىزدى، بۇل ءىشىنارا ايماقتاعى قانداس نەكەلەر تاريحىمەن تۇسىندىرىلەدى. گەنەتيكالىق قاۋىپتەردى ءتۇسىنۋ مەديتسينا قىزمەتكەرلەرىنە بەلسەندى شارالار قابىلداۋعا، پاتسيەنتتەردىڭ ناتيجەلەرىن جاقسارتۋعا جانە جۇرەك-تامىر اۋرۋلارى مەن قانت ديابەتى سياقتى سوزىلمالى اۋرۋلاردىڭ ۇزاق مەرزىمدى اۋىرتپالىعىن ازايتۋعا مۇمكىندىك بەرەدى، - دەيدى فاحەد ءال-مارزۋكي.
نەكە قۇرۋدى جوسپارلاعان بارلىق جۇپ 2025 -جىلدان باستاپ مىندەتتى گەنەتيكالىق تەستىلەۋدەن وتەدى، ال تەست ناتيجەلەرىن وڭدەۋ شامامەن 14 كۇندى الادى.
