بىرىككەن اراب امىرلىگى يرانمەن ساۋدا جانە قارجىلىق وپەراتسيالاردى توقتاتتى
استانا. KAZINFORM - بىرىككەن اراب امىرلىگى يرانمەن ساۋدا، كوممەرتسيالىق جانە قارجىلىق وپەراتسيالاردى توقتاتاتىنىن مالىمدەدى. بۇل شەشىم ب ا ءا قورعانىس مينيسترلىگىنىڭ يران اۋماعىنان ەكى بالليستيكالىق زىمىران ۇشىرىلعانى تۋرالى مالىمدەمەسىنەن كەيىن قابىلداندى، دەپ حابارلايدى تاسس.
- يرانمەن بارلىق ساۋدا، كوممەرتسيالىق الىس-بەرىس جانە قارجىلىق وپەراتسيالار كەلەسى حابارلاماعا دەيىن توقتاتىلادى، - دەلىنگەن ب ا ءا سىرتقى ىستەر مينيسترلىگىنىڭ X الەۋمەتتىك جەلىسىندە جاريالاعان مالىمدەمەدەسىندە.
بۇعان دەيىن ب ا ءا قورعانىس مينيسترلىگى يراننان ەكى بالليستيكالىق زىمىران ۇشىرىلعانىن حابارلاعان بولاتىن.
مينيسترلىك مالىمەتىنشە، ءبىر زىمىران ەلدىڭ اۋماقتىق سۋلارىنان تىس جەرگە، ەكىنشىسى ونىڭ اۋماقتىق سۋلارىنا قۇلاعان. مينيسترلىك شابۋىل تەڭىز كەمەلەرىنە باعىتتالعانىن مالىمدەدى.
يران سىرتقى ىستەر مينيسترلىگىنىڭ وكىلى ەسمايل باگاي تەگەراننىڭ ب ا ءا -گە زىمىران ۇشىرعانىن ءۇزىلدى كەسىلدى جوققا شىعاراتىنىن مالىمدەدى. ونىڭ ايتۋىنشا، مۇنداي ايىپتاۋلار تاتۋ كورشىلىك كەلىسىمىنە قايشى كەلەدى.
باگاي بارلىق تاراپتى يرانعا قارسى نەگىزسىز ايىپتاۋلاردان باس تارتۋعا جانە ا ق ش پەن يزرايلدىڭ ايماقتاعى ارەكەتىنە بايلانىستى بولىپ جاتقان جاعدايدى ەسكەرۋگە شاقىردى.
بۇعان دەيىن يران ا ق ش- تى پارسى شىعاناعىن لاستادى دەپ ايىپتادى.
