بىرنەشە مەديتسينالىق انىقتاما ەلەكتروندى تۇردە بەرىلەدى

استانا. KAZINFORM - كەلەسى جىلدان باستاپ كەيبىر مەديتسينالىق انىقتامالار قاعاز تۇرىندە بەرىلمەيدى، ولار ەلەكتروندى فورماتقا اۋىستىرىلادى. بۇل تۋرالى دەنساۋلىق ساقتاۋ ءمينيسترىنىڭ ورىنباسارى ەربول وسپانوۆ ءمالىم ەتتى.

«كەلەسى جىلدان باستاپ 8 مەديتسينالىق انىقتاما، ونىڭ ىشىندە ناۋقاس پاراعى جانە ەڭبەككە ۋاقىتشا جارامسىزدىق تۋرالى انىقتاما تەك ەلەكتروندىق تۇردە بەرىلەدى. ەندى پاتسيەنتتەرگە قاعاز انىقتامالاردى وزىمەن بىرگە الىپ ءجۇرۋ قاجەتتىگى جوق. ازاماتتاردىڭ كەلىسىمىمەن ەلەكتروندى انىقتامالار تالاپ ەتىلگەن مەكەمەلەرگە جىبەرىلەدى. اتالعان قىزمەتتەردى ەلەكتروندىق فورماتقا كوشىرۋ ءۇشىن قازىرگى ۋاقىتتا «امبۋلاتوريالىق- ەمحانالىق كومەك» اج ارقىلى اقپاراتتىق جۇيەلەردى ينتەگراتسيالاۋ بويىنشا جۇمىستار جۇرگىزىلىپ جاتىر»، - دەدى ەربول وسپانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ۆيتسە-ءمينيستردىڭ ايتۋىنشا، ازاماتتار جەكە باسىنا قاتىستى مەديتسينالىق دەرەكتەردى «EGOV mobile» موبيلدى قوسىمشاسىنداعى «eDensaulyq» بولىمىنە كىرىپ، قول جەتكىزە الادى.

كەلەر جىلدان باستاپ تومەندەگى مەديتسينالىق انىقتامالار ەلەكتروندى فورماتقا كوشىرىلەدى:

- ناۋقاس پاراعى؛

- 075/ۋ مەديتسينالىق انىقتاما؛

- 026/ۋ دارىگەرلىك- كونسۋلتاتيۆتىك كوميسسيا قورىتىندىسى؛

- 073/ۋ كولىكتى باسقارۋعا رۇقسات تۋرالى انىقتاما؛

- 069 / ۋ «شيپاجاي- كۋرورتتىق كارتا؛

- 052-2 / ۋ بالانىڭ دەنساۋلىق پاسپورتى؛

- 076 / ۋ قارۋعا رۇقسات الۋ؛

- 038 / ۋ ەڭبەككە ۋاقىتشا جارامسىزدىق تۋرالى انىقتاما.

ايتا كەتسەك، بىرەر كۇن بۇرىن دەنساۋلىق ساقتاۋ ءمينيسترى اقمارال ءالنازاروۆا ەندى دارىگەرلەر قاتەلىگى ءۇشىن شىعىندى ءوز قالتاسىنان تولەمەيتىنىن ايتقان ەدى.

اۆتور

داۋلەت ىزتىلەۋ