بۇگىن - قازاق كينوسىنىڭ كۇنى
استانا. KAZINFORM - بۇگىن - قازاق كينوسىنىڭ تۋعان كۇنى. وسىدان 87 جىل بۇرىن ەڭ العاشقى قازاق دىبىستىق فيلمى «امانگەلدى» فيلمى ءتۇسىرىلدى. كينوسسەناريدى قازاق دراماتۋرگى عابيت مۇسىرەپوۆ پەن جازۋشى ۆسيەۆولود يۆانوۆ بىرىگىپ جازدى.
«امانگەلدى» كوركەم فيلمى قازاق كينوسىنىڭ تاريحىنان سۇبەلى ورىن الادى. قازاق كينوتانۋشىسى قابىش سيرانوۆ 1944 -جىلعى ماقالاسىندا بىلاي دەپ جازعان:
«1937 -جىلى لەنين وردەندى «لەنفيلم» كينوستۋدياسى تولىقمەتراجدى «امانگەلدى» دىبىستى فيلمىن جاساپ شىعاردى. كينوسسەناريدى قازاق دراماتۋرگى عابيت مۇسىرەپوۆ پەن جازۋشى ۆسيەۆولود يۆانوۆ بىرىگىپ جازدى. كارتينا رەجيسسەرى مويسەي ليەۆين بولدى. بۇل فيلم - ۇلتتىق كينەماتوگرافيانىڭ نەگىزىن قالاعان ەڭ العاشقى كينوسۋرەتىمىز».
اقيقاتىندا سسەناري جازۋعا بەيىمبەت مايلين دە اتسالىسقان ەدى. سول جىلدارداعى كەڭەس ۇكىمەتىنىڭ سولاقاي ساياساتىنىڭ كەسىرىنەن الاش ارىسىنىڭ ەسىمى تيتردەن الىنىپ تاستالعان. قويۋشى رەجيسسەرى - مويسەي ليەۆين، وپەراتورى - حەچو نازاريانتس.
فيلمگە قازاقتىڭ ۇلى اكتەرلەرى ءتۇستى. باستى ءرولدى، ياعني امانگەلدى بەينەسىن تەاتر اكتەرى ەلۋباي ءومىرزاقوۆ سومداسا، ودان بولەك سەركە قوجامقۇلوۆ، قاليبەك قۋانىشبايەۆ، قاپان بادىروۆ، قانابەك بايسەيىتوۆ، قۇرمانبەك جانداربەكوۆ، شارا جيەنقۇلوۆا، راحمەتۋللا سالمەنوۆ سياقتى ارتىستەر فيلمگە قاتىسادى.
تاريحي ريەۆوليۋتسيالىق، بيوگرافيالىق فيلم بولعاندىقتان فيلمنىڭ كوركەم شىعۋى دراماتۋرگيالىق جۇمىس، رەجيسسۋرالىق جۇمىس پەن اكتەرلىق جۇمىسقا بايلانىستى ەدى.
ال الماتى كينوستۋدياسى قازاق ك س ر حالىق كوميسسارلارى كەڭەسىنىڭ قاۋلىسىمەن 1941 -جىلدىڭ 12-قىركۇيەك كۇنى قۇرىلعان. ول 1960 -جىلى اتاۋى «قازاق فيلم» كينوستۋدياسى دەپ وزگەرتىلىپ، 1984-جىلى وعان قازاق كينەماتوگرافياسىنىڭ كەمەڭگەر قايراتكەرى شاكەن ايمانوۆتىڭ ەسىمى بەرىلدى.
2005 -جىلى قازاقستان كينەماتوگرافيستەرى وداعىنىڭ باسشىسى بولعان باۋىرجان نوگەربەكوۆ 12 -قىركۇيەكتى «قازاق كينوسىنىڭ كۇنى» دەپ اتاۋدى ۇسىندى. سوعان سايكەس، 12 -قىركۇيەك - قازاق كينوسىنىڭ كۇنى رەتىندە اتالىپ كەلەدى.
ايتا كەتسەك، بيىل جىل باسىندا مادەنيەت جانە اقپارات مينيسترلىگىنىڭ القا وتىرىسىندا ايدا بالايەۆا «قازاق فيلم» كينوستۋدياسىنىڭ قازىرگى جاي-كۇيى تۋرالى پىكىر ءبىلدىرىپ، مەملەكەتتىك قولداۋعا ۇمىتكەر كينوجوبالار بايقاۋى وزگەرەتىنىن ايتتى. سونداي-اق مينيستر «كينەماتوگرافيا تۋرالى» زاڭعا وزگەرىستەر ەنگىزۋ جوسپارلانعانىن اتاپ ءوتتى. ونىڭ ىشىندە ش. ايمانوۆ اتىنداعى «قازاق فيلم» كينوستۋدياسىنا مەملەكەتتىك قولداۋ كورسەتىلمەك.
اۆتور
مۇرات اياعان
