بىلتىر قازاقستان مەن وزبەكستان اراسىنداعى تاۋار اينالىمى 4,2 ميلليارد دوللاردان استى
تاشكەنت. قازاقپارات - 2024 -جىلدىڭ قورىتىندىسى بويىنشا قازاقستان وزبەكستاننىڭ نەگىزگى ساۋدا سەرىكتەستەرىنىڭ ۇشتىگىندە قالدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

وزبەكستان ستاتيستيكا اگەنتتىگىنىڭ اقپاراتىنا ساي، قاڭتار-جەلتوقسان ارالىعىندا ەلدىڭ سىرتقى ساۋدا اينالىمى $65,9 ميلليارد دوللارعا جەتىپ، بىلتىرعى كەزەڭمەن سالىستىرعاندا %3,8- عا ءوستى. بۇگىنگى تاڭدا كورشىلەس مەملەكەت الەمنىڭ 198 ەلىمەن ساۋدا-ساتتىق جاسايدى.
2024 -جىلدىڭ قورىتىندىسى بويىنشا ەلدىڭ باستى ساۋدا سەرىكتەستەرى كوشىن قىتاي باستاپ تۇر. ەكى مەملەكەت اراسىنداعى تاۋار اينالىمى 12,4 ميلليارد دوللاردان (جالپى كولەمنىڭ %18,9) استى.
ودان كەيىنگى ورىندا ساۋدا- ساتتىقتىڭ %17,6 ۇلەسى تيەسىلى رەسەي تۇر. بۇل ەلمەن اراداعى يمپورت- ەكسپورت كولەمى 11,6 ميلليارد دوللار بولدى.
سونىمەن قاتار، كوشباسشىلاردىڭ ۇشتىگىن قازاقستان تۇيىندەدى. ءبىزدىڭ ەل مەن وزبەكستان اراسىنداعى تاۋار اينالىمى 4,22 ميلليارد دوللاردان (%6,5) استى.
قامتىلىپ وتىرعان كەزەڭدە وزبەكستان قازاقستانعا 1,4 ميلليارد دوللاردىڭ تاۋارىن ەكسپورتتاپ، 2,8 ميلليارد دوللاردان استام سوماعا تاۋار يمپورتتاعان.
ەسكە سالايىق، بىلتىر قازاقستاننان وزبەكستانعا 800 ميلليون دوللارعا جۋىق اقشا اۋدارىلعان.
بۇعان دەيىن حابارلاعانىمىزداي، وزبەكستاندا قازاقستاندىق كاپيتالمەن مىڭنان استام كاسىپورىن جۇمىس ىستەيدى. بۇل رەتتە رەسمي استانا مەن تاشكەنت اراسىنداعى ءوڭىرارالىق بايلانىس نىعايىپ كەلەدى.
سونىمەن قاتار، قازاقستان مەن وزبەكستاندى بايلانىستىراتىن جاڭا تەمىرجول جەلىسى سالىنىپ جاتىر.
اۆتور
ءاليحان اسقار