بىلتىر قازاقستان 79 ميلليارد دوللاردىڭ ءونىمىن ەكسپورتتاعان

استانا. KAZINFORM - بىلتىر قازاقستاننىڭ سىرتقى ساۋداداعى تاۋار اينالىمى 140 ميلليارد دوللارعا جەتكەن. بۇل تۋرالى پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ۇكىمەت وتىرىسىندا ايتتى.

«قاڭتار ايىنىڭ قورىتىندىسى بويىنشا قازاقستان ەكونوميكاسىنىڭ ءوسۋ قارقىنى %3,9 بولدى. ونىڭ ىشىندە ناقتى سەكتور %3,8، قىزمەت كورسەتۋ سالاسى %3,5 ءوستى. سالالار اراسىندا ەڭ جوعارى ءوسۋدى قۇرىلىس، كولىك جانە قويمالاۋ، اقپارات جانە بايلانىس، سونداي-اق وڭدەۋ ونەركاسىبى كورسەتتى»، - دەدى مينيستر.

ونىڭ سوزىنشە، ينۆەستيتسيالار اعىنى اسىرەسە ءبىلىم بەرۋ (3,6 ەسە)، قارجى جانە ساقتاندىرۋ قىزمەتى (3 ەسە) كولىك جانە قويمالاۋ (2,1 ەسە)، قۇرىلىس (2 ەسە)، اقپارات جانە بايلانىس (%20,9)، وڭدەۋ ونەركاسىبى (%15,8) سالالارىندا ارتقان.

وڭىرلەر اراسىندا ەڭ جوعارى ءوسۋ جەتىسۋ، ۇلىتاۋ، جامبىل جانە الماتى وبلىستارىندا بايقالدى.

الدىن الا قورىتىندى بويىنشا 2023 - جىلى سىرتقى ساۋدا تاۋار اينالىمى %3,2 ءوسىپ، 140 ميلليارد دوللارعا جۋىقتادى. ەكسپورت 79 ميلليارد دوللارعا جۋىقتاپ، ونىڭ ىشىندە وڭدەلگەن تاۋارلار ەكسپورتى 25 ميلليارد دوللاردان استى.

«تاۋارلار يمپورتى 61 ميلليارد دوللاردان استى. جالپى، وڭ ساۋدا بالانسى 18 ميلليارد دوللارعا جۋىق. وڭدەۋ ونەركاسىبىندە وڭ ءوسۋ ساقتالىپ وتىر. ءوندىرىس كولەمى %6,9 ءوستى. كورسەتكىشتىڭ ءوسۋى 14 وڭىردە تىركەلدى. سونىڭ ىشىندە ەڭ جوعارى ءوسۋدى اقتوبە، شىعىس قازاقستان، قىزىلوردا جانە اباي وبلىستارىندا بايقالدى»، - دەدى نۇرلان بايبازاروۆ.

اۆتور

ەسىمجان ناقتىباي