بىلتىر قازاقستان 31,2 ميلليون توننا كومىر ەكسپورتتادى
استانا. KAZINFORM - الداعى جىلىتۋ ماۋسىمىنا دايىندىق جوسپارى ازىرلەندى. تولىعىراق ونەركاسىپ جانە قۇرىلىس ءمينيسترى قانات شارلاپايەۆ ايتىپ بەردى.
«2023 -جىلدىڭ قورىتىندىسى بويىنشا ەلىمىزدە 112,7 ميلليون توننا كومىر ءوندىرىلدى (2022 -جىلى 113,7 ميلليون توننا)، ونىڭ ىشىندە كوممۋنالدىق- تۇرمىستىق قاجەتتىلىككە 9 ميلليون توننا، ەنەرگيا جانە جىلۋ ءوندىرۋشى كاسىپورىندارعا 65,9 ميلليون توننا، ونەركاسىپتىك كاسىپورىندارعا 5,9 ميلليون توننا جونەلتىلدى. بىلتىر كومىر ەكسپورتى 31,2 ميلليون توننانى قۇرادى»، - دەدى قانات شارلاپايەۆ ۇكىمەت وتىرىسىندا.
ودان بولەك، ەل وڭىرلەرىنە 9,2 ميلليون توننا قاتتى وتىن جەتكىزىلگەن.
«كومىرمەن قامتاماسىز ەتۋ جونىندەگى رەسپۋبليكالىق شتاب جەدەل شارا قابىلدادى. كومىردى اۆتوكولىكپەن اكەتۋگە تىيىم سالۋ تۋرالى بۇيرىقتىڭ مەرزىمى ۇزارتىلدى. سونىمەن قاتار الەۋمەتتىك كومىردىڭ سىرتقا كەتۋى توقتاتىلدى. مينيسترلىك دەلدالداردى الىپ تاستاۋ جانە تۇتىنۋشىلارعا تۇپكىلىكتى قۇنىن تۇراقتاندىرۋ ءۇشىن كومىردى وڭىرلەر بويىنشا بىركەلكى ءبولۋ جانە وڭىرلىك كومىر وپەراتورلارى اراسىندا تىكەلەي قول جەتكىزۋ بويىنشا جۇمىستى جالعاستىرۋدا»، - دەيدى ول.
ونىڭ ايتۋىنشا، مينيسترلىك الداعى جىلىتۋ ماۋسىمىنا دايىندالۋ ماقساتىندا بيۋدجەتتىك ۇيىمدار مەن حالىقتى كومىرمەن قامتاماسىز ەتۋ جونىندەگى جەرگىلىكتى اتقارۋشى ورگاندار، كومىر ءوندىرۋشى كاسىپورىندار مەن قازاقستان تەمىر جولى كومپانياسىمەن بىرلەسىپ، ارنايى ءىس-شارالار جوسپارىن ازىرلەدى.
اۆتور
داۋلەت ىزتىلەۋ
