بىلتىر ءبىر عانا تۇركىستان وبلىسىنىڭ ءبىلىم سالاسىندا ميللياردتاعان اقشا جىمقىرىلعان

استانا. KAZINFORM - وتكەن جىلدىڭ باسىنان بەرى ءبىلىم سالاسىندا 192 سىبايلاس جەمقورلىق قىلمىسى تىركەلدى. ولار بويىنشا زالال 13 ميلليارد تەڭگەدەن استى.

ەڭ ءىرى جىمقىرۋ تۇركىستان، جەتىسۋ، الماتى، قىزىلوردا، اقتوبە وبلىستارى مەن الماتى قالاسىندا انىقتالدى.

تۇركىستان وبلىسىنىڭ ەكى اۋدانىندا عانا شاردارا جانە سارىاعاش ءبىلىم ءبولىمى قىزمەتكەرلەرى ءۇش جىل ىشىندە 3,7 ميلليارد تەڭگە جىمقىرعان. قازىرگى ۋاقىتتا تەرگەۋ ءجۇرىپ جاتىر.

جەتىسۋ وبلىسىندا تالدىقورعان قالاسى ءبىلىم ءبولىمىنىڭ باس بۋحگالتەرى باستاعان ۇيىمداسقان قىلمىستىق توپقا قاتىستى تەرگەۋ اياقتالدى.

قاراجات ءبىلىم سالاسىنىڭ قىزمەتكەرى ەمەس تۇلعالاردىڭ شوتىنا اقشا اۋدارۋ ارقىلى جىمقىرىلعان.

سونىمەن قاتار، قۇرامىندا 3 ءبىلىم ءبولىمىنىڭ قىزمەتكەرى مەن 10 مەكتەپ بۋحالتەرى بار قىلمىستىق توپتىڭ مۇشەلەرى وزدەرىنە جانە باسقا مەكتەپ قىزمەتكەرلەرىنە بەلگىلەنگەن جالاقىدان جوعارى جالاقى تولەگەن.

ولارعا جالپى سوماسى 4,2 ميلليارد تەڭگەدەن استام شىعىن كەلگەن.

زالالدى وتەۋ ماقساتىندا جالپى سوماسى 3 ميلليارد تەڭگەگە قاتىسۋشىلاردىڭ مۇلكى تاركىلەندى.

قىلمىستىق ءىس قابىلدانعان شەشىمنىڭ زاڭدىلىعىن تەكسەرۋ جانە سوتتا ايىپتاۋدى ودان ءارى قولداۋ ءۇشىن قاداعالاۋ ورگانىنا بەرىلدى.

بۇل رەتتە جىمقىرۋ فاكتىلەرىنە باقىلاۋشى ورگانداردىڭ لاۋازىمدى ادامدارىنىڭ قامقورلىعى كەزىندە جول بەرىلدى.

وتكەن جىلدىڭ قاراشا ايىندا تالدىقورعان قالالىق سوتىنىڭ ۇكىمىمەن ءبىلىم باسقارماسىنىڭ باس مامانى د. تولەباي سوتتالدى.

ول تالدىقورعان قالاسىنداعى ورتا مەكتەپتەردىڭ تاريفتىك ءتىزىمىن جالاقىنىڭ جوعارى قاجەتتىلىگىمەن كەدەرگىسىز قاراعانى جانە كەلىسىپ، لاۋازىمدىق وكىلەتتىگىن اسىرا پايدالانعانى ءۇشىن كىنالى دەپ تانىلدى.

تەرگەۋ بارىسىندا د. تولەباي جەمقورلىق قىلمىس جاساعانى ءۇشىن كىنانى تولىق مويىنداپ، ءىس جۇرگىزۋ كەلىسىمىن جاساسۋ جونىندە ءوتىنىش ءبىلدىردى.

سوت ۇكىمىمەن وعان مەملەكەتتىك قىزمەتتە قىزمەت ەتۋ قۇقىعىنان ءومىر بويىنا ايىرا وتىرىپ، 3 جىل 6 ايعا باس بوستاندىعىن شەكتەۋ تۇرىندەگى جازا تاعايىندالدى.

وسى سوت ۇكىمىمەن 2023 -جىلعى شىلدەدە الماتى وبلىسى بويىنشا تەكسەرۋ كوميسسياسىنىڭ مەملەكەتتىك اۋديتورى ب. بوتابەكوۆ كىنالى دەپ تانىلدى.

ول تالدىقورعان قالاسىنداعى مەكتەپتەردىڭ بىرىندە اۋديتورلىق تەكسەرۋ بارىسىندا انىقتالعان جىمقىرۋ فاكتىلەرىن جاسىرعانى ءۇشىن 500 مىڭ تەڭگە كولەمىندە پارا الدى دەپ ايىپتالدى.

قىلمىستىق ءىس كىنانى مويىنداۋىنا بايلانىستى جەدەلدەتىلگەن تارتىپپەن اياقتالدى.

سوت شەشىمىمەن ب. بوتابەكوۆكە پارانىڭ 15 ەسەلەنگەن سوماسى - 7,5 ميلليون تەڭگە ايىپپۇل سالىندى.

سونىمەن قاتار، تالدىقورعان قالاسىنىڭ ءبىلىم ءبولىمىنىڭ باسشىسى اسا اۋىر جەمقورلىق قىلمىس جاساۋدا اشكەرەلەندى.

ول انىقتالعان جىمقىرۋ فاكتىلەرىن جاسىرعانى ءۇشىن ءبىلىم ءبولىمىنىڭ باس بۋحگالتەرىنەن 280 ميلليون تەڭگە كولەمىندە پارا الۋ بويىنشا ايىپتى.

قازىرگى ۋاقىتتا ايىپتالۋشىعا قاتىستى قىلمىستىق ءىس سوتتا قارالىپ جاتىر.

اقتوبە وبلىسىندا اقتوبە قالاسى ورتا مەكتەبىنىڭ باس بۋحگالتەرىنە قاتىستى قىلمىستىق ءىس قارالىپ جاتىر.

تەرگەۋ مالىمەتى بويىنشا، 8 جىل بويى ول ءوزىنىڭ بانكتىك شوتىنا جالاقى تۇرىندە اقشا اۋدارعان. قىلمىستىق ءىس بويىنشا جالپى زالال 413 ميلليون تەڭگەدەن استى.

تەك ءبىر جىلدىڭ ىشىندە ول وزىنە 200 ميلليون تەڭگەدەن استام قاراجات اۋدارعان، بۇل - بۇكىل مەكتەپتىڭ جىلدىق ەڭبەكاقى قورىنىڭ %30.

سونىمەن قاتار، اتالعان مەكتەپتىڭ ديرەكتورىنا قاتىستى قىلمىستىق ءىس سوتقا جىبەرىلدى، ول ءوزىنىڭ لاۋازىمدىق وكىلەتتىكتەرىن اسىرا پايدالانىپ، باس بۋحالتەرگە ءوزىنىڭ ە س ق كىلتىن تاپسىردى، سونىڭ سالدارىنان جوعارىدا اتالعان جىمقىرۋ فاكتىلەرى جاسالدى.

بۇدان باسقا، ول ناقتى جۇمىس ىستەمەيتىن پەداگوگكە، سونداي- اق مەكتەپ قىزمەتكەرلەرىنە بەلگىلەنگەن جالاقىدان ارتىق جالاقى اۋدارۋ ارقىلى 6 ميلليون تەڭگەدەن استام سوماعا قاراجات جىمقىرۋ بويىنشا كۇدىكتى.

بيۋدجەت قاراجاتىن جوسپارلاۋ جانە يگەرۋ پروتسەستەرىندەگى جەمقورلىق تاۋەكەلدەرىن بولماس ءۇشىن پاۆلودار، اقمولا جانە تۇركىستان وبلىستارىندا ءبىلىم سالاسىنىڭ بيۋدجەتىن تسيفرلاندىرۋ بويىنشا پيلوتتىق جوبا ىسكە قوسىلدى.

ول ءبىلىم سالاسىندا ميللياردتاعان تەڭگەنى جىمقىرۋ سەبەپتەرىن جويۋ ماقساتىندا بيۋدجەتتىك وتىنىمدەردى قالىپتاستىرۋ جانە ۇسىنۋ پروتسەسىن اۆتوماتتاندىرۋدى كوزدەيدى.

اقپاراتتىق جۇيەنى تەستىلەۋ ناتيجەسى وڭ بولعان جاعدايدا، جوبا بۇكىل ەل بويىنشا ىسكە قوسىلادى.