بىلتىر 9 ايدا 5,4 ميلليون وتاندىق تۋريست ەل ىشىندە ساياحاتتادى

استانا. KAZINFORM - وتكەن جىلدىڭ 9 ايىنىڭ قورىتىندىسى بويىنشا وتاندىق تۋريستەر سانى ارتقان. بۇل تۋرالى تۋريزم جانە سپورت ءمينيسترى ەرجان مارجىقپايەۆ ءمالىم ەتتى.

«وتكەن جىلدىڭ 9 ايىنىڭ قورىتىندىسى بويىنشا 5,4 ميلليون وتاندىق ازامات ەل ىشىندە ساياحات جاسادى. بۇل 2022-جىلدىڭ سايكەس كەزەڭىمەن سالىستىرعاندا 550 مىڭ ادامعا كوپ. بيىل جىل قورىتىندىسى بويىنشا ىشكى تۋريستەر سانى 9 ميلليون ادامعا جەتەدى دەپ بولجانىپ وتىر»، - دەدى ەرمەك مارجىقپايەۆ ۆەدومستۆونىڭ كەڭەيتىلگەن القا وتىرىسىندا.

ءمينيستردىڭ ايتۋىنشا، شەتەلدىك تۋريستەر سانىنىڭ ايتارلىقتاي ءوسۋى بايقالادى.

«2023-جىلدىڭ العاشقى 9 ايىندا بۇل كورسەتكىش 2022-جىلدىڭ سايكەس كەزەڭىمەن سالىستىرعاندا 1,5 ەسە ءوسىپ، 830 مىڭنان اسا ادامعا جەتتى. اتالعان كەزەڭدە قوناق ۇيلەر، دەمالىس بازالارى، جاتاقحانالار جانە باسقا دا ورنالاستىرۋ ورىندارى 175 ميلليارد تەڭگەدەن استام تابىس تاپتى. بۇل الدىڭعى جىلعى تابىس كورسەتكىشىمەن سالىستىرعاندا %36-عا ۇلعايعان»، - دەيدى ول.

اۆتور

داۋلەت ىزتىلەۋ