بەيجىڭدە كەسپەحانا اسپازى مەن داياشىلارىن تولىقتاي روبوت الماستىردى
استانا. KAZINFORM - بەيجىڭنىڭ فەنتاي اۋدانىندا سىناق رەجيمىندە ەل استاناسىنداعى تۇڭعىش تولىقتاي اۆتوماتتاندىرىلعان كەسپەحانا جۇمىسىن باستادى، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى China Daily-گە سىلتەمە جاساي وتىرىپ.
اۋدانى 400 شارشى مەترلىك عيماراتتا روبوتتار شامامەن ءۇش مينۋتتا كەسپە دايىنداپ، ونى پىسكەن بويدا اكەلىپ بەرەدى. ماشينالار قامىر يلەپ، ونى كەسەدى جانە قايناتا الادى، سونىمەن قوسا ءتۇرلى تۇزدىقتار قوسىپ، دايىن استى تۋرا ۇستەل باسىنا اكەلەدى. قىزمەتكەرلەر بولسا، تەك ينگرەديەنتتەر قورىن تولىقتىرىپ، تەحنيكانىڭ جۇمىسىن قاداعالايدى جانە ىدىستاردى جينايدى.
ينتەگراتسيالانعان جۇيەنى بەيجىڭدەگى Beijing Yuli Technology Co كومپانياسى جاساپ شىقتى. بۇعان دەيىنگى پيلوتتىق جوبالاردا روبوتتار تەك كەيبىر ارەكەتتەردى عانا ورىندايتىن، ال بۇل جوبادا تاماق ازىرلەۋ جانە ۇسىنۋ باستان-اياق اتقارىلادى.
- بۇرىن مۇنداي تەحنولوگيالار تەك جەكەلەگەن ارەكەتتەردى ورىنداعان نەمەسە تانىستىرىلىم ءۇشىن قولدانىلاتىن. ءبىزدىڭ مىندەتىمىز - وسى قىزمەت ءتۇرىن كۇن سايىن كوممەرتسيالىق ماقساتتا پايدالانۋ ءۇشىن بارلىق كەزەڭدى ءبىرىڭعاي جۇيەگە بىرىكتىرۋ، - دەيدى كومپانيا باس ديرەكتورىنىڭ ورىنباسارى يان حايبين.
كومپانيا اتالعان مەيرامحانا تەحنولوگيانىڭ سىناق الاڭى رەتىندە قىزمەت ەتىپ جاتقانىن، ءبارى ءساتتى وتسە، ول جاپپاي وندىرىسكە جىبەرىلەتىنىن مالىمدەدى.
مەيرامحانا تولىعىمەن تامىز ايىنىڭ اياعىندا اشىلادى دەپ جوسپارلانىپ وتىر.
جوبا بەيجىڭنىڭ روبوتوتەحنيكانى ماسشتابتاۋ جونىندەگى (2025- 2027 ج ج.) ءۇش جىلدىق جوسپارى اياسىندا باستاۋ الدى. وسى باعدارلاما بويىنشا جازدا قالادا تازالاۋ جانە پاترۋلدەۋگە ارنالعان 72 روبوت ىسكە قوسىلدى، سونىمەن قاتار اۋرۋحانالاردىڭ بىرىندە ءدارىحانا جۇمىسى اۆتوماتتاندىرىلدى.
بۇعان دەيىن گۋمانويدتى روبوتتاردىڭ ەكىنشى دۇنيەجۇزىلىك ويىندارى بەيجىڭدە وتەتىنى حابارلانعان بولاتىن.
