بەيجىڭ جازبالارى. تولىق اۆتوماتتاندىرىلعان ءوندىرىس
قىتاي استاناسى بەيجىڭ قالاسىنا جولىمىز تۇسكەن ءبىر ساپاردا قىتاي مادەنيەتىنىڭ بىزگە بەيمالىم تۇستارى جايلى جازۋعا تىرىستىق.

JAC كەلە جاتىر
ءبىراق بۇل كونسەرن باياعىدا- اق كەلگەن. 2015 -جىلدان بەرى بىزدەگى كولىك سالاسىنداعى جەتەكشى كومپانيالارمەن الىس- بەرىس جۇرگىزىپ، قازىر بۇلارعا تيەسىلى اۆتوموبيلدەردىڭ ءتۇر- ءتۇرىن ءبىزدىڭ ەلدە ءبىراز ادام ءمىنىپ جۇرگەنى بەلگىلى. ەندىگىسى بولەك كەلىس. قازاقستاندا كولىك ساتۋدا العاشقىلاردىڭ قاتارىندا بولماعانمەن كوپ ۇزاماي الدىڭعى ۇشتىكتەن كورىنۋى ابدەن مۇمكىن. ويتكەنى بيىلعى ساۋدا ءبىزدىڭ ەلگە بىلتىرعىعا قاراعاندا ءۇش ەسە كوبەيگەن. ياعني 701 اۆتوكولىك ساتقان.

باعاسى دا شىرقاپ تۇرعان جوق. قوزعالتقىشى 2000 تەكشە س م جەڭىل كولىكتىڭ قىتايداعى باعاسى بىزدىڭشە 6-7 ميلليون تەڭگە. سوعان قاراعاندا بىزدە قالتالاقتاپ جۇرگەن لادا، ودان قالدى Cobalt-تىڭ داۋرەنى از قالدى بىلەم.
زاۋىت دجيپ تە، كروسسوۆەر دە، مينيۆەندەردىڭ ءتۇر- ءتۇرىن دە شىعارادى. بەنزين، توقپەن جۇرەتىنى، گيبريد ءبارى وسىندا. قازىر الەمنىڭ 130 ەلىنە ءوز تەحنيكاسىن ەكسپورتتاپ وتىر. بۇل زاۋىت كۇنىنە 40 شاقتى اۆتوموبيل شىعارادى. Jianghuai Automobile Group Corp جالپى اۆتوبۋس پەن جۇك كولىكتەرىن جانە جۇك ارتقىشتاردىڭ ءتۇر- ءتۇرىن جاسايتىن ءىرى قۇرىلىم. بۇل زاۋىت كولىكتى تولىق قۇراستىرادى جانە بولشەكتەردى دە وزدەرى جاسايدى. وزىنەن باسقا 20 باعىنىشتى كاسىپورنى بار. ولاردىڭ تورتەۋى ءوندىرىس.

ۇرىمجىدە وسى زاۋىتتى كوردىك. ۇلكەن زاۋىتتا 300-دەي عانا ادام جۇمىس ىستەيدى. ءبىراق قارا جۇمىسقا جەگىلىپ جاتقان جان جوق. كەرەك- جاراقتى روبوت تاسيدى. روبوت كولىكتى جينايدى. تەك قاداعالاپ، باعىتتاپ تۇراتىن تۇستارى بار. تولىق اۆتوماتتاندىرىلعان ءوندىرىس. سايمان تاسىپ جۇرگەن روبوت الدىنان ادام شىعا قالسا توقتاپ جول بەرەدى. ءبىر قىزىعى كولىكتى بويايتىن سەح شاعىن، ءارى بوياۋدىڭ ءيسى شىقپايدى. قاسىندا تۇرعان ادام ەشتەڭە سەزبەيدى، زيانسىز. قازاقتىڭ ۇل- قىزدارى دا وسى زاۋىتتا ەڭبەك ەتىپ ءجۇر. سونداعى اعايىن ەرجانات جەكەننىڭ ايتۋىنشا جۇمىس ۋاقىتى تاڭەرتەڭگى 10-دا باستالادى. جۇمىسشىلار ەل قاتارلى 8 ساعات جۇمىس ىستەيدى. سەنبى- جەكسەنبى - دەمالىس. جالاقىلارى ءبىزدىڭ اقشامەن 400 مىڭداي. مۇنىڭ سىرتىندا سىياقىسى بار.
وسىندا جۇمىس ىستەيتىندەر كولىك الاتىن بولسا، 20 پايىز جەڭىلدىك بەرىلەدى. ياعني، تاڭداعان كولىكتىڭ 80 پايىزىن تولەسەڭىز بولدى. ءوزىڭىز عانا ەمەس، وتباسىڭىزداعى وزگە ادام السا دا سولاي.
ارمان امەن، «حابار-24» ارناسىنىڭ رەداكتورى (جالعاسى بار)
www.24.kz