بيشىمبايەۆتىڭ تاعدىرىن شەشەتىن سۇراقتار: القابيلەر كەڭەسىپ جاتىر
استانا. KAZINFORM - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ايىپتالۋشىلار قۋاندىق بيشىمبايەۆ پەن باقىتجان بايجانوۆقا قاتىستى ءوتىپ جاتقان سوت پروتسەسىندە سۋديا ايجان قۇلبايەۆا القابيلەرگە قويىلاتىن سۇراقتى وقىپ بەردى. جاۋاپ نەگىزىندە ۇكىم شىعارىلماق.
سۇراقتار جاريا ەتىلگەننەن كەيىن 10 القابي ۇكىمدى شىعارۋ ءۇشىن كەڭەسۋ بولمەسىنە كەتتى. سۋديا ۇكىمنىڭ جاريالانۋ ۋاقىتى كەيىنىرەك بەلگىلى بولاتىنىن ايتتى.
ايتا كەتەيىك، بۇعان دەيىن قۋاندىق بيشىمبايەۆ پەن باقىتجان بايجانوۆ سوڭعى ءسوزىن ايتقان بولاتىن. العاشقىسى بۇعان دەيىن العا تارتقان فاكتىلەردى تاعى ءبىر مارتە ەسكە سالىپ، سالتانات نۇكەنوۆانى قاتىگەزدىكپەن ولتىرمەگەنىن جەتكىزدى.
بايجانوۆ بولسا، سالتاناتتىڭ ءولىمىن جاسىرۋ بىلاي تۇرسىن، ءولىم اۋزىندا جاتقانىن بىلمەگەنىن العا تارتقان بولاتىن.
سونىمەن، القابيلەرگە قويىلاتىن سۇراقتار تومەندەگىدەي:
1. 2022 -جىلدىڭ 16-جەلتوقسانىنان 2023 -جىلدىڭ 9-قاراشاسىنا دەيىن، 2023 -جىلدىڭ ناۋرىزىندا، ساۋىرىندە جانە جازدا الماتى، استانا قالالارىندا نۇكەنوۆاعا فيزيكالىق كۇش قولدانىلىپ، دەنەسىنىڭ جانە باسىنىڭ ءار جەرىن بىرنەشە رەت ۇرعانى جانە ونىڭ ار-وجدانىنا مورالدىق ازاپ كورسەتىلگەنى دالەلدەندى مە؟
2. بۇل ىستەردى بيشىمبايەۆ ىستەگەنى دالەلدەندى مە؟
3. بيشىمبايەۆ وسى ءىستى ىستەگەنى ءۇشىن كىنالى مە؟
4. جابىرلەنۋشى نۇكەنوۆا بيشىمبايەۆپەن بىرگە تۇرعالى جۇمىس ىستەۋىن توقتاتىپ، تابىسسىز قالعانى جانە ماتەريالدىق تۇرعىدا تاۋەلدى بولىپ قالعانى دالەلدەندى مە؟
5. قىلمىستىق كودەكستىڭ 99-بابى، 2-بولىگى، 5-تارماعى بويىنشا ايىپ بويىنشا ءبىرىنشى سۇراق: قىلمىس بولعان كۇنى، اتاپ ايتقاندا 2023 -جىلدىڭ 9-قاراشاسىندا، شامامەن تۇستەن كەيىن جابىرلەنۋشى العان جاراقاتتارىنان قايتىس بولعانى دالەلدەندى مە؟
6. سيپاتتالعان جاعدايلاردا جابىرلەنۋشىنىڭ قاساقانا جانە قاساقانا ماقساتتى تۇردە بىرنەشە رەت ۇرىپ-سوعۋ ارقىلى العان جاراقاتتارى ولىمىنە سەبەپ بولعانى دالەلدەندى مە؟
7. سوتتالۋشى جابىرلەنۋشىنىڭ ومىرىنە قاساقانا اياۋسىز فيزيكالىق جانە مورالدىق ازاپتاۋعا، اۋىر جانە ۇزاققا سوزىلعان ازاپقا ۇشىراتىپ، كوپ مولشەردە دەنە جاراقاتتارىن كەلتىرىپ، وعان سۋ بەرمەي، قورلاعانى دالەلدەندى مە؟
8. ءبىرىنشى سۇراقتا سيپاتتالعان جاعدايلاردا جابىرلەنۋشىنىڭ دەنساۋلىعىنا اۋىر زيان كەلتىرگەن، جابىرلەنۋشىنىڭ ابايسىزدا ولىمىنە اكەپ سوقتىرعان باسىنا كوپتەگەن سوققى جاسالعانى، بۇل ارەكەتتى سوتتالۋشى جاساعانى دالەلدەنگەن بە؟
ەستەرىڭىزگە سالساق، ايىپتالۋشى بيشىمبايەۆ بۇعان دەيىن دە سالتاناتتىڭ ولىمىندە ءوز كىنام بار ەكەنىن مويىنداپ، ۇرىپ-سوققانىن جاسىرماعان.
اۆتور
ورالحان قوجانوۆ
