بيشىمبايەۆقا ۇكىم شىعاراردا سوت 20 زاڭ بۇزۋشىلىققا جول بەردى - قورعاۋشى

сот
Фото: Жоғарғы сот

استانا. KAZINFORM - ەلوردالىق سوتتا قۋاندىق بيشىمبايەۆ پەن باقىتجان بايجانوۆ ءىسى بويىنشا اپەللياتسيالىق سوتىنىڭ ءبىرىنشى وتىرىسى باستالدى. سوتتا ءبىرىنشى بولىپ ق. بيشىمبايەۆتىڭ ادۆوكاتى ەرلان عازىمجانوۆ ءسوز سويلەدى.

قورعاۋشى بيشىمبايەۆقا شىعارىلعان ۇكىممەن كەلىسپەيتىنىن مالىمدەدى.

«مەن ونى زاڭسىز دەپ سانايمىن جانە قىلمىستىق كودەكستىڭ «ابايسىزدا ولىمگە اكەپ سوقتىرعان دەنساۋلىققا اۋىر زيان كەلتىرۋ» بويىنشا 106-بابىنا اۋىستىرىلىپ، جازا ازايتىلۋى قاجەت. ال «ازاپتاۋ» بابى بويىنشا ۇكىمنىڭ كۇشى جويىلىپ، ءىس قايتا قاراۋعا جىبەرىلۋى كەرەك»، - دەدى ە. عازىمجانوۆ.

ونىڭ ايتۋىنشا، ۇكىمدى وزگەرتۋگە جانە جويۋعا بولادى. ويتكەنى قورعاۋشى ءبىرىنشى ساتىداعى سوت جاساعان 20 بۇزۋشىلىقتى انىقتاپ، اپەللياتسيادا كورسەتكەن. ادۆوكات القابيلەر القاسىن قۇرۋ كەزىندە سوتتىڭ كەيبىر كانديداتتارعا قارسىلىق ءبىلدىرۋىن ءبىرىنشى اۋىر قۇقىقبۇزۋشىلىق دەپ اتادى.

«سۋديا ءوز ەركىمەن شەشىم قابىلداپ، قايسىسىنىڭ سوتتالۋشىمەن جاستى بالالارى بار ەكەنىن انىقتاي باستادى جانە 20 ۇمىتكەردىڭ ىشىنەن تورتەۋىن شىعارىپ تاستادى. شىعارىلعان ءۇش ۇمىتكەردىڭ ۇلدارى بار ەدى. وسىلايشا، سۋديا القابيلەر القاسىن قۇرۋ ءتارتىبىن بۇزباعاندا جانە زاڭ بويىنشا ارەكەت ەتكەندە، وسى 4 ۇمىتكەردىڭ ىشىنەن بىرەۋ نەگىزگى قۇرامعا كىرىپ، داۋىس بەرەر ەدى. ۇكىم باسقاشا بولۋى مۇمكىن ەدى»، - دەدى ە. عازىمجانوۆ.

ەسكە سالساق، 2023 -جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى.

قۋاندىق بيشىمبايەۆ 24 جىلعا سوتتالدى.

اۆتور

ايجان سەرىكجان قىزى

سوڭعى جاڭالىقتار