بىشكەكتەگى جانجال: قازاقستانداعى شەتەلدىك ستۋدەنتتەر قالاي قورعالىپ جاتىر
استانا. KAZINFORM – ق ر عىلىم جانە جوعارى ءبىلىم ءمينيسترى ساياسات نۇربەك قىرعىزستانداعى شەتەلدىك ستۋدەنتتەر مەن جەرگىلىكتى تۇرعىندار اراسىنداعى جانجالدان كەيىن قازاقستاندا قانداي شارالار قابىلدانعانىن ايتتى.
«جالپى، پاكىستان مەن ءۇندىستاننان كەلگەن 12 مىڭعا جۋىق شەتەلدىك ستۋدەنت بار. شەتەل ازاماتتارى ءبىلىم الىپ جاتقان ۋنيۆەرسيتەتتەردىڭ رەكتورلارىمەن جينالىس وتكىزدىك، ياعني تەك پاكىستان مەن ءۇندىستاننان كەلگەن ستۋدەنتتەر وقيتىن ۋنيۆەرسيتەتتەرمەن شەكتەلىپ قالمادىق. ستۋدەنتتەر تۇراتىن ورىنداردا تاۋلىك بويى كەزەكشىلىك بەلگىلەندى. اتاپ ايتقاندا، نەگىزىنەن ءۇندىستان مەن پاكىستان ازاماتتارى مەديتسينالىق جانە ينجەنەرلىك ماماندىقتاردا ءبىلىم الىپ جاتىر»، - دەدى س. نۇربەك ۇكىمەت وتىرىسىنان كەيىن وتكەن باسپا ءسوز ءماسليحاتىندا.
مينيستر اتالعان ەلدەردەن كەلگەن شەتەلدىك ستۋدەنتتەر مەديتسينالىق اكادەميالاردا، سونداي-اق استانا حالىقارالىق ۋنيۆەرسيتەتىندە، ءال-فارابي اتىنداعى قازاق ۇلتتىق ۋنيۆەرسيتەتىندە، كوكشەتاۋ ۋنيۆەرسيتەتىندە وقىپ جاتقانىن ايتتى. قازىر بارلىق جەردە كەزەكشىلىك قويىلعان.
«ەندى تەك وسى ستۋدەنتتەرمەن عانا ەمەس، ءبىزدىڭ ستۋدەنتتەرمەن دە الدىن الۋ ءىس-شارالارىن اتقارامىز»، - دەدى ساياسات نۇربەك.
ەسكە سالساق، 18-مامىردا بىشكەكتە شەتەلدىكتەر قاتىسقان جاپپاي توبەلەس بولدى. ول 13-مامىردا جاتاقحانا قوناقتارى اراسىنداعى جانجالدان باستالعان.
بۇل تۇرعىدا قىرعىزستان پرەزيدەنتى بىشكەكتەگى وقيعا جونىندە ۇندەۋ جاسادى.
اۆتور
رۋسلان عابباسوۆ
