بىشكەكتە ۆاگوندا تۇراتىن ادامداردىڭ ءومىرى تۋرالى كورمە اشىلادى

بۇگىن بىشكەكتە «ۋاقىتشا ايالداما» فوتوكورمەسى باستالادى، ول كادىمگى ۆاگوندا ۇيىمداستىرىلادى. قازاقپارات بۇل تۋرالى كابار اگەنتتىگىنە سىلتەمە جاساپ حابارلايدى.

ۆاگون ابدىلاس مالدىبايەۆ اتىنداعى قىرعىز ۇلتتىق اكادەميالىق وپەرا جانە بالەت تەاترىنىڭ الدىنا ورنالاسقان. جوبا اۆتورى اننا كارامۋرزينانىڭ يدەياسىنا سايكەس، كەلۋشىلەر مۇنداي ۇيدە تۇراتىن ادامدار ءومىرىنىڭ اتموسفەراسىنا ەنۋى ءۇشىن ونىڭ ىشىنە تۇرمىستىق زاتتار، كىتاپتار جانە فوتوسۋرەتتەر قويىلعان.

اننا قىرعىزستاننىڭ ءارتۇرلى ايماقتارىن ارالاپ، ۆاگوندا تۇراتىن قىرعىزستاندىقتاردىڭ ءومىر سالتىن زەرتتەگەن.

سوڭعى ون جىل بويى وسى زەرتتەۋمەن اينالىسقان ول ۆاگوندارداعى قىرعىزستاندىقتاردىڭ تۇرمىس- تىرشىلىگىن، تۇسىرىلگەن فوتوسۋرەتتەرىن جۇرتشىلىق نازارىنا ۇسىنۋدى ارماندادى.

ۆاگوندار بارلىق جەردە ۋاقىتشا تۇرعىن ءۇي، ءقوناقۇي، ساياجاي، اسحانا، تەحنيكالىق قىزمەت كورسەتۋ ستانسيالارى نەمەسە كىتاپحانا رەتىندە پايدالانىلادى. ولاردى ەلدىڭ ءار تۇكپىرىنەن، جولدىڭ بويىنان نەمەسە كوممۋنيكاتسيادان الشاق تاۋلى ايماقتاردان كەزدەستىرۋگە بولادى.

سونداي- اق اننا كارامۋرزينا ەلەكتر جارىعى جوق شالعاي ايماقتاردا ادامدار شامداردى نەمەسە تەلەفوندى قۋاتتاۋ ءۇشىن كۇن باتارەيالارىن پايدالانعاندى ءجون سانايتىنىن انىقتادى.

«جاپان دالاداعى ۆاگونداردى كورگەندە، وندا تۇراتىن ادامداردىڭ بۇل جەرگە قالاي كەلگەنىن ءبىلۋ ماعان قىزىق. مەن مۇنداي ۆاگونداردى 2013 -جىلدان بەرى سۋرەتكە ءتۇسىرىپ كەلەمىن. ءار تۇسىرگەن سايىن جاڭا ورىندار، جاڭا پەيزاج، جاڭا ءومىر سالتىن كەزدەستىرەمىن. ءوز جوبامدا كەرەمەت تابيعات اياسىندا، جازىق دالادا جانە قوعامنان الشاق تىرشىلىك ەتىپ جاتقان ادامداردىڭ ەلەۋسىز تىرشىلىگىنە كوپشىلىكتىڭ نازارىن اۋدارعىم كەلەدى»، - دەدى جوبا اۆتورى.

اۆتور

ەركەجان سماعۇلوۆا