بيۋدجەتكە 4,5 تريلليون تەڭگەگە جۋىق كىرىس كىردى: قارجى ءمينيسترى پرەزيدەنتكە ەسەپ بەردى

Мәди Тәкиев
Фото: akorda.kz

استانا. KAZINFORM - مەملەكەت باسشىسى قارجى ءمينيسترى ءمادي تاكيەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

پرەزيدەنتكە مەملەكەتتىك قارجىنىڭ نەگىزگى پارامەترلەرى، ونىڭ ىشىندە بيىلعى 1-توقساندا جۇمسالعان رەسپۋبليكالىق بيۋدجەت قاراجاتى تۋرالى ەسەپ بەرىلدى. وسى رەتتە 3 ايدىڭ قورىتىندىسى بويىنشا مەملەكەتتىك بيۋدجەتكە 4,5 تريلليون تەڭگەگە جۋىق كىرىس كىرگەن.

قاسىم-جومارت توقايەۆقا ءونىمسىز بيۋدجەت شىعىندارىن وڭتايلاندىرۋ جۇمىستارى جونىندە مالىمەت بەرىلدى.

ءمادي تاكيەۆتىڭ ايتۋىنشا، جۇرگىزىلگەن ساراپتاما ناتيجەسىندە بيىل 300 ميلليارد تەڭگەدەن استام سومانى قىسقارتۋ ۇسىنىلعان. بۇل قاراجات ەكونوميكالىق قايتارىمى بارىنشا جوعارى شارالارعا جۇمسالادى.

مەملەكەت باسشىسىنا بيۋدجەتتى باسقارۋ تيىمدىلىگىن ارتتىرۋ باعىتىندا قابىلدانىپ جاتقان جۇمىستار تۋرالى باياندالدى. اتالعان شارالار جاڭا بيۋدجەت كودەكسىنە ەنگىزىلگەن.

بۇدان بولەك پرەزيدەنتكە سالىقتىق- كەدەندىك اكىمشىلەندىرۋ ىسىندەگى جاڭا باستامالار تانىستىرىلدى. ءمينيستردىڭ ايتۋىنشا، جاڭا سالىق كودەكسىنىڭ جوباسىندا سالىقتىق اكىمشىلەندىرۋدىڭ سەرۆيستىك مودەلى ەنگىزىلگەن، تەكسەرۋلەر سانىن قىسقارتۋ جونىندەگى نورمالار قاراستىرىلعان، كامەرالىق باقىلاۋ جانە سالىق بەرەشەگىن ءوندىرىپ الۋ تاسىلدەرى وزگەرتىلگەن.

سونىمەن قاتار قاسىم-جومارت توقايەۆقا ەۋرازيالىق ەكونوميكالىق وداقتىڭ ءۇشىنشى ەلدەرمەن كەدەندىك شەكاراسىنداعى ينفراقۇرىلىمدى جاڭعىرتۋ جۇمىستارى جونىندە اقپارات بەرىلدى. جوبانىڭ جۇزەگە اسىرىلۋى وتكىزۋ مۇمكىندىگىن 6 ەسەگە دەيىن ۇلعايتىپ، ءوتۋ ۋاقىتىن 2 ەسە قىسقارتۋعا، سونداي-اق تاۋارلار مەن كولىك قۇرالدارىن تەكسەرۋ ءىسىن تاۋلىك بويى ونلاين رەجيمدە باقىلاۋعا مۇمكىندىك بەرەدى. بارلىق وتكىزۋ پۋنكتىن رەكونسترۋكتسيالاۋ جۇمىستارىن جىل سوڭىنا قاراي اياقتاۋ جوسپارلانىپ وتىر.

ءمادي تاكيەۆ مەملەكەتتىك ساتىپ الۋ جۇيەسىن رەفورمالاۋ جوسپارى جونىندە ايتتى.

ونىڭ مالىمەتىنشە، «مەملەكەتتىك ساتىپ الۋ تۋرالى» جاڭا زاڭ جوباسىندا ساتىپ الۋ راسىمدەرىن جەڭىلدەتۋ جانە بيۋروكراتيادان ارىلتۋ، قۇرىلىس نارىعىندا مونوپولياعا جول بەرمەۋ، بارلىق مەملەكەتتىك جانە كۆازيمەملەكەتتىك ۇيىمنىڭ ساتىپ الۋلارىن ءبىرىڭعاي پلاتفورماعا كوشىرۋ كوزدەلگەن.

كەزدەسۋ سوڭىندا پرەزيدەنت مەملەكەتتىك قارجىنىڭ جاعدايىن جاقسارتۋ، اتاپ ايتقاندا، بيۋدجەتتىڭ تەڭگەرىمدىلىگىن قامتاماسىز ەتۋ، سونداي- اق سالىقتىق جانە كەدەندىك اكىمشىلەندىرۋ سالالارىن سيفرلاندىرۋ ارقىلى جەتىلدىرۋ جونىندە ءبىرقاتار تاپسىرما بەردى.

اۆتور

ايدار وسپاناليەۆ

سوڭعى جاڭالىقتار