بيۋدجەت شىعىنىنىڭ جارتىسى ۇلتتىق قوردان جانە قارىزعا الىنىپ جاتىر - سمايىلوۆ
استانا. KAZINFORM - پارلامەنت پالاتالارىنىڭ بىرلەسكەن وتىرىسىندا جوعارى اۋديتورلىق پالاتا ءتوراعاسى ءاليحان سمايىلوۆ ۇكىمەتتىڭ بيۋدجەت قالىپتاستىرۋ كەزىندە جىبەرەتىن كەمشىلىكتەرىنە توقتالدى.
«باستى پروبلەما - بيۋدجەتتىڭ تۇراقتى تاپشىلىعى. سوڭعى جىلدارى شىعىستار ەداۋىر ءوسىپ كەلەدى. بۇل رەتتە مۇنايعا قاتىستى ەمەس كىرىستەر شىعىستاردىڭ %50- عا جۋىعىن قامتاماسىز ەتىپ وتىر. قالعان بولىگى نەگىزىنەن ۇلتتىق قوردىڭ ترانسفەرتتەرى جانە قارىز تارتۋ ەسەبىنەن وتەلەدى. سوندىقتان تاپشىلىقتى ۇستاپ تۇرۋ جەتكىلىكسىز. ول ءۇشىن تاپشىلىعى جوق بيۋدجەتتى قالىپتاستىراتىن ۇزاقمەرزىمدى جوسپار قاجەت»، - دەدى ول.
سونداي-اق، ول ۇلتتىق قوردى باسقارۋدىڭ نورماتيۆتىك قۇقىقتىق بازاسى تۇراقتاندىرۋ كەرەكتىگىن ايتتى.
«ولاي بولماعان جاعدايدا مەملەكەت باسشىسىنىڭ ۇلتتىق قوردىڭ ۆاليۋتالىق اكتيۆتەرىن 2030 -جىلعا قاراي 100 ميلليارد دوللارعا دەيىن ۇلعايتۋ جونىندەگى ماقساتىنا قول جەتكىزبەۋ تاۋەكەلى جوعارى ەكەنىن كورىپ وتىرمىز. قارىز الۋ قۇرالىن كەڭىنەن قولدانۋ دا بورىش جۇكتەمەسىنىڭ تاۋەكەلىن ارتتىرادى. قازىردىڭ وزىندە بورىشتى وتەۋ جانە قىزمەت كورسەتۋ شىعىستارى بيۋدجەتتىڭ بارلىق تۇسىمدەرىنىڭ %17- دان استامىن قۇرايدى»، - دەدى باس اۋديتور.
اۆتور
ەسىمجان ناقتىباي
