بوزىمبايەۆ مينيسترگە قىتاي مەن رەسەيدەن كەلەتىن وزەندەر ماسەلەسىن ءبىرجولا شەشۋدى تاپسىردى

استانا. KAZINFORM - پرەمەر-ءمينيستردىڭ ورىنباسارى قانات بوزىمبايەۆ سۋ رەسۋرستارى جانە يرريگاتسيا مينيسترلىگىنىڭ القا ماجىلىسىندە ۆەدومستۆو باسشىسى نۇرجان نۇرجىگىتوۆكە بيىل سۋ ديپلوماتياسىن جانداندىرۋعا ەرەكشە كوڭىل ءبولۋدى تاپسىردى.

ونىڭ ايتۋىنشا، بۇل شارا رەسەي مەن قىتايدان باستاۋ الاتىن وزەندەردىڭ جىلدار بويى شەشىمىن تاپپاي كەلە جاتقان ماسەلەسىن رەتتەۋ ءۇشىن قاجەت.

- رەسەي باعىتىندا ءوزارا اتقارىلىپ جاتقان جۇمىستارعا قاراماستان، جايىق، ەرتىس سياقتى ءىرى وزەندەردىڭ باسسەيندەرىندە زەرتتەۋلەر جۇرگىزۋ ىنتىماقتاستىعىنىڭ جول كارتاسىن ءارى قاراي دا ىسكە اسىرۋعا ەرەكشە نازار اۋدارۋ كەرەك. بيىل اقپان ايىنان باستاپ ەكى تاراپ تا تاسقىنعا دايىندىقتى بەلسەندى ءارى، ءبىر-ءبىرىن قۇلاقتاندىرا وتىرىپ جۇرگىزىپ جاتقانىن اتاپ ءوتۋ قاجەت. قازاقستان رەسەي اۋماعىنداعى سۋ قويمالارىنىڭ جۇمىس رەجيمىن الدىن الا تۇزەتىپ وتىرۋ ءۇشىن جەدەل جۇمىستى جالعاستىرۋدى تاپسىرامىن، - دەدى ۆيتسە-پرەمەر.

قانات بوزىمبايەۆتىڭ پايىمداۋىنشا، قىتاي باعىتىندا دا وسىنداي جىلدار بويى شەشىلمەي كەلە جاتقان ماسەلەلەر بار.

- ءبىر سوزبەن ايتقاندا، بيىل مينيسترلىككە سۋ ديپلوماتياسىن جانداندىرۋ كەرەك، - دەدى پرەمەر-ءمينيستردىڭ ورىنباسارى.

مينيستر نۇرجان نۇرجىگىتوۆتىڭ ايتۋىنشا، ۆەدومستۆو قۇرامىندا قىتاي مەن رەسەيدەن كەلەتىن ترانسشەكارالىق وزەندەر بويىنشا كەلىسسوز جۇرگىزە الاتىن 8 سۋ ديپلوماتى بار.

اۆتور

ەسىمجان ناقتىباي