ديريجابلمەن ساياحاتتاۋ قايتادان سۇرانىسقا يە بولا باستادى

ديريجابلمەن ساياحاتتاۋ قايتادان سۇرانىسقا يە بولا باستادى. كۇن ەنەرگياسىنان قۋات الاتىن ۇشۋ اپپاراتى ەش جەرگە قونباي ءۇزىلىسسىز جەردى ەكۆاتور بويىمەن اينالىپ شىعۋعا دايىن. ساياحاتقا ءۇش ادام تاڭدالىپ الىندى.

Дирижабль
Фото: aikyn.kz

Solar Airship One نولدىك كومىرتەگى شىعارىندىلارى بار ديريجابلمەن دۇنيەجۇزى بويىنشا العاش رەت ەش جەرگە قونباي ءۇزىلىسسىز ساياحات جاساۋعا دايىندالۋدا. New Atlas سايتىندا جاريالانعان ماقالاعا سىلتەمە جاساي وتىرىپ، Aikyn.kz ۇشۋ اپپاراتىن جاساۋدا عالىمداردىڭ قانداي ماقساتى بولعانىن تۇسىندىرەدى.

اسىقپاي ساياحاتتاۋدى ۇناتاتىن ادامدارعا Solar Airship One ءديريجابلى ۇناۋى ءتيىس. 40000 شاقىرىم بولاتىن ەكۆاتوردىڭ بويىمەن جەر شارىن ەشقانداي جاعارمايسىز ۇشىپ وتۋگە 20 كۇن قاجەت بولادى.

ۇزىندىعى 151 مەتر ۇشۋ اپپاراتىنىڭ ۇستىڭگى بەتى كۇن ساۋلەسىن ەنەرگياعا اينالدىراتىن پلەنكامەن جابىلعان. ونىڭ اۋدانى 4800 شارشى مەتر نەمەسە ستاندارتتى فۋتبول الاڭىنا تەڭ.

كۇندىز كۇن پانەلدەرى ءديريجابلدىڭ ەلەكتر ستانسالارىن قۋاتتايدى، سونىمەن قاتار سۋدى ەلەكتروليزدەۋ ارقىلى سۋتەگىنى جيناپ، تۇنگى ۇشۋعا قوسىمشا قۋات جينايدى. تۇندە سۋتەگى وتىن ۇياشىعى ارقىلى ءوتىپ، ءديريجابلدىڭ تۇنگى ساياحاتىن قۋاتتاندىرادى.

جاڭا تەحنولوگيالىق شەشىمدەرگە تولى ديريجابلدى ءۇش ادامنان تۇراتىن كوماندا باسقارادى: بۇرىنعى فرانسۋز استروناۆتى جانە اۋە كۇشتەرىنىڭ ۇشقىشى ميشەل تونيني، ۇشاق اپاتىنان امان قالىپ، ءبىراق قيمىلى شەكتەۋلى ۇشقىش ايەل دورين بۋرنەتون جانە ساياحاتشى، العاشقى ءۇزىلىسسىز ۇشۋدى دالەلدەگەن بەرتران پيككار. ول 1999 -جىلى اۋە شارىمەن الەمدى اينالىپ ۇشىپ وتكەن، سونداي- اق 2015-2016 -جىلدارى 16 جارىم ايدا جەر شارىن العاش رەت كۇن ەنەرگياسىمەن عانا قۋاتتاناتىن ەكسپەريمەنتالدى Solar Impulse 2 ۇشاعىن باسقارعان.

جوعارىدا ايتقانىمىزداي، Solar Airship One ديريجابل تۇندە كۇندىز جيناقتالعان سۋتەگىمەن جۇرەدى. جەردى اينالىپ ۇشۋدى ۇيىمداستىرۋشى Euro Airship كومانداسى ديريجابلدىڭ ورتاشا جىلدامدىعى 83 شاقىرىم/ساع بولاتىنىن مالىمدەدى.

زاماناۋي ۇشۋ اپپاراتتارىمەن سالىستىرعاندا بۇل باياۋ بولعانىمەن، ديريجابلدەردىڭ نەگىزگى ارتىقشىلىقتارى بار: ونى قالاعان جەرگە قوندىرىپ، كەز كەلگەن نۇكتەدەن اۋەگە كوتەرۋگە بولادى، وعان ۇشۋ- قونۋ جولاعى قاجەت ەمەس.

وسىنداي مۇمكىندىكتەر ديريجابلدى جاپپاي ساياحاتتارعا قولدانۋعا بولاتىنىن كورسەتەدى. تەحنولوگيا ارزانداعان سايىن شارىن مەن بوزجىرا، سارى ارقا مەن بەرەل قورىمىنىڭ عاجاپ كورىنىستەرىن باياۋ ۇشاتىن اپپاراتپەن تاماشالاۋ دا قىمباتقا تۇسە قويماس. قازاقتىڭ ىسكەر ازاماتتارى بۇنى دا قولعا الاتىن كۇن الىس ەمەس شىعار.

بۇگىندە AirYacht جانە تانىمال Airlander سياقتى جوبالار ديريجابلدەردى جولاۋشىلارعا ءساندى ساياحاتىنىڭ ءبىر ءتۇرى رەتىندە ۇسىنعانىمەن، بولاشاقتا سۋتەگى وتىنىمەن جۇمىس ىستەيتىن ديريجابلدەر 8-10 ەسە اۋىر جۇكتەردى تاسىمالداۋعا جارايدى دەپ سانايدى.

ەكونوميكالىق جاعىنان دا ديريجابلدەر ءتيىمدى بولماقشى: ترانسپورتتىق ۇشاقتارمەن سالىستىرعاندا جۇك تاسۋ قۇنى 4 ەسە ارزان.

مىنا ۆيدەودا Solar Airship One تۋرالى قوسىمشا مالىمەتتەر بار:

Solar Airship One ديريجابلىنىڭ ءىشى كولەمى 50000 تەكشە مەتر بولاتىن گەلي تولتىرىلعان 15 سەگمەنتكە بولىنگەن كونسترۋكتسيادان تۇرادى.

گەلي جەردەگى جالعىز ەلەمەنت، ونى ەشقانداي گازبەن الماستىرۋعا كەلمەيدى جانە گەلي - قالپىنا كەلمەيتىن جەردەگى جالعىز رەسۋرس. جەردىڭ تەرەڭ قاباتتارىندا پايدا بولاتىن گەلي تابيعي گازبەن بىرگە جەر بەتىنە شىعادى. ول اۋاعا تارالعان كەزدە تىكەلەي اتموسفەرانىڭ جوعارى قاباتىنان عارىشقا ۇشىپ كەتەدى.

سوڭعى جاڭالىقتار