بويىندا قازاق قانى بار اعىلشىن قازاقستانعا ۆەلوسيپەدپەن كەلدى
پەتروپاۆل. KAZINFORM – ۇلى بريتانيا تۇرعىنى امانجول نيكولاس مۋحامەدجانوۆ ماكينتاير كەللەتت قازاقستانعا ناعاشى جۇرتىن ىزدەپ كەلگەن.
امانجولدىڭ اناسى - قازاق، اكەسى - اعىلشىن. ولار قازاق جەرىندە تانىسىپ، تابىسىپ، قازىر لوندوندا تۇرىپ جاتىر.
ۇلى بريتانيا ازاماتى امانجولدىڭ قارىنداسى مەن ءىنىسىنىڭ دە ەسىمدەرى قازاقشا، جاندوس، توعجان اتتى باۋىرلارى بار.
25 جاستاعى جىگىتتىڭ ماماندىعى - ساۋلەتشى.
امانجول لوندوننان شىلدە ايىندا شىعىپ، بۇكىل ەۋروپانى ۆەلوسيپەدپەن باسىپ ءوتىپ، الماتى قالاسىنا قازان ايىندا جەتكەن. سول جەردە تۋىستارىنىڭ ۇيىندە قوناقتا بولىپ، شاھاردىڭ اسەم جەرلەرىن ارالاپ، جاڭا جىلدىڭ الدىندا پەتروپاۆلعا كەلدى.
- قازاقستانعا، انامنىڭ تۋعان جەرىنە ۆەلوسيپەدپەن كەلۋ مەنىڭ ارمانىم ەدى. بۇل ساياحاتقا ءبىر جىل دايىندالدىم. ۆەلوسيپەدپەن ساياحاتتاۋدىڭ ءوز قيىندىعى بار، وزىممەن بىرگە كوپ زات الا المادىم. جولدا قونۋ ءۇشىن پالاتكا الدىم، جالپى ساپارعا شىقپاس بۇرىن الدىن الا جوسپارلاۋ قاجەت.
قازاقستان جەرىنە كىرگەن كەزدە اۋا رايىنا قاتىستى قيىندىقتار بولدى. قاتتى جەلدە ءجۇرۋ، دالادا قونۋ فيزيكالىق تۇرعىدا قيىن، - دەيدى امانجول.
ساياحاتشىنىڭ ايتۋىنشا، ۆەلوسيپەدى شامامەن 2 مىڭ ا ق ش دوللارى تۇرادى. ساپارعا شىقپاس بۇرىن جىگىت كولىگىن جولعا يكەمدەپ، كەي بولشەكتەرىن شىدامدى بولۋى ءۇشىن اۋىستىرعان. جولدا قالماۋ ءۇشىن قاجەتتى سايمانداردى دا وزىمەن بىرگە الا شىققان.
جالپى ۆەلوسيپەدپەن مۇنداي الىس ساپارعا ونىڭ العاش شىعۋى.
- جۇمسالعان اقشاعا لوندوننان پەتروپاۆلعا ۇشاقپەن بارىپ-كەلۋگە بولار ەدى. ءبىراق وكىنبەيمىن. قازاقستان جەرى كەڭ-بايتاق ەكەن. ەڭ تاڭقالدىرعانى - حالقى. ادامدارى ەڭ قوناقجاي، مەيىرىمدى. كەلگەننەن مەنى قوناققا شاقىرىپ جاتىر، - دەيدى ۇلى بريتانيا ازاماتى.
قازىر امانجول پەتروپاۆلدا تۋعان-تۋىستارىنىڭ ۇيىندە قوناقتاپ جاتىر.
- امانجول - مەنىڭ انامنىڭ ءسىڭلىسىنىڭ ۇلى. ەر ادامدى شىڭدايتىن ۇزاق ساپاردا بولىپ كەلىپ وتىر. ءبىراق جولدا كەزدەسكەن قيىندىقتارى تۋرالى ءتىس جارعان جوق. جالپى قاراپايىم. وسى ساپاردان كۇتكەنى ويىنان شىعىپ وتىر. بىزبەن، تۋعان-تۋىسىمەن تانىسۋدى ماقسات ەتكەن بولاتىن، اناسى تۋعان توپىراقتى باسىپ، ەڭ باستىسى - ناعاشى اجەسىمەن كەزدەسپەك ەدى. الايدا، ۇلگەرمەدى، اجەمىز قايتىس بولدى. سوندىقتان بۇل ساياحات امانجول ءۇشىن وتە ماڭىزدى، - دەيدى بولەسى ايجان كولچينا.
ۇلى بريتانيا ازاماتى پەتروپاۆلدا وسى ايدىڭ جيىرماسىنا دەيىن بولىپ، كەيىن تۋعان جەرىنە قايتپاق.
