بوتەلكەدەگى سۋ ادامعا قاۋىپتى

сув
Фото: Kazinform

استانا. قازاقپارات - عالىمدار «بوتەلكەدەگى سۋدىڭ پايداسىنان زيانى كوپ» دەگەن قورىتىندىعا كەلدى. حيميالىق ساراپتاما بارىسىندا مۇنداي سۋلاردىڭ قۇرامىنداعى زالالسىزداندىرۋشى زاتتار، فارماسەۆتيكالىق پرەپاراتتار جانە باسقا دا حيميكاتتار ۇلەسى جوعارى ەكەندىگى انىقتالدى.

اتالعان زاتتاردىڭ بارلىعى ادام دەنساۋلىعىنا ايتارلىقتاي زالال كەلتىرۋى مۇمكىن. ونىمەن سالىستىرعاندا قۇبىرداعى سۋ الدەقايدا تازا. بۇل تۋرالى Rbcdaily گازەتى حابارلادى.

«ادام دەنساۋلىعىنا پايدالى»، «تازا سۋ» دەپ جارنامالانىپ جاتقان بۇل سۋلارعا قاتىستى بۇدان بۇرىن دا بىرنەشە رەت ايتىلعان. زەرتتەۋلەرگە سۇيەنسەك، مۇنداي سۋداعى ەڭ قاۋىپتى دۇنيە - پلاستيكتى جاساۋدا قولدانىلاتىن بيسفەنول-ا. بۇل زات بوتەلكەنىڭ جىلى جەردە ءبىراز ۋاقىت تۇرعان كەزدە بولىنەدى ەكەن. ا ق ش-تاعى زەرتتەۋلەردىڭ بىرىندە قاتىسۋشىلاردىڭ 95 پايىزىنىڭ زارىندە بيسفەنول-ا انىقتالىپتى.

وسى جولعى زەرتتەۋدى جۇرگىزگەن اۆستراليالىق تاكسولوگيا پروفەسسورى كريس ۋيندەردىڭ ايتۋىنشا، جانۋارلارعا جاسالعان تاجىريبەنىڭ ارقاسىندا بيسفەنول-ا-نىڭ ءارتۇرلى اۋرۋلارعا سەبەپشى بولاتىنى دالەلدەنگەن. ونداي اۋرۋلاردىڭ قاتارىندا ءوسۋ جۇيەسى، قالقانشا بەزى، ورتالىق جۇيكە جۇيەسى قىزمەتتەرىنىڭ بۇزىلۋى سياقتى قاۋىپتىلەرى دە بار. شامادان تىس سەمىرىپ، قان قىسىمىنىڭ كوتەرىلسە دە بوتەلكەدەگى سۋدىڭ اسەرى دەۋگە بولادى. ءبىراق بيسفەنول-ا-نىڭ ادامعا زيانىنا بايلانىستى عالىمدار ويى ءارتۇرلى. سەبەبى، ادام مەن جانۋارعا ءبىر ەلەمەنت نە ارەكەتتىڭ اسەرى ءارقالاي. زەرتتەۋ جۇمىستارى ازىرشە جانۋارلارعا جۇرگىزىلگەن.

پلاستيكالىق بوتەلكەگە قۇيىلعان سۋدىڭ باستى كەمشىلىكتەرىنىڭ ءبىرى - باعاسىندا. ول قۇبىرداعى سۋدان ءجۇز ەسەدەي قىمبات. سونىمەن قوسا، پلاستيكالىق بوتەلكەلەردىڭ ءوندىرىلۋى قورشاعان ورتاعا ورنى تولماس زالال كەلتىرۋدە. سۋ قۇيۋعا قاجەت بوتەلكەلەر ءۇشىن جىلىنا 1،5 ميلليون توننا پلاستيك وندىرىلەدى ەكەن.

كوبىنەسە بوتەلكەنى سۋ ساقتاۋ ماقساتىندا قايتا-قايتا قولدانىپ جاتامىز. ول دا قاتە. پلاستيكالىق بوتەلكەدەگى باكتەريالار بەلسەندى تۇردە كوبەيە بەرۋى مۇمكىن. سوندىقتان، ءار قولدانۋدىڭ الدىندا بوتەلكەنى سالقىن سۋمەن مۇقيات جۋۋ كەرەك.

ايدوس ارىپبايەۆ

«ايقىن»

سوڭعى جاڭالىقتار