بودەنە جۇمىرتقاسىنا سۇرانىس ارتىپ كەلەدى

استانا. قازاقپارات- نۋتريتسيولوگ مامانداردىڭ ايتۋىنشا ونىڭ ەتى دە، جۇمىرتقاسى دا دارۋمەنگە تولى. قازىر بودەنە اسىرايتىن ازاماتتار كوبەيىپ كەلەدى. ماسەلەن تاۋلىگىنە 3 مىڭ جۇمىرتقا مەن 3 كەلى بودەنە ەتىن وندىرەتىن كاسىپكەردىڭ ءبىرى استانادا تۇرادى.

ول كۇنىنە 50-60 مىڭ تەڭگە پايدا تابادى. ەلوردالىق باعلان سارباسوۆتىڭ بودەنە كاسىبىمەن اينالىسقانىنا كوپ بولعان جوق. دەسە دە كاسىپ يەسى از ۋاقىت ىشىندە قۇس سانىن 5 مىڭعا جەتكىزگەن. ولاردىڭ جۇمىرتقاسى مەن ەتىن ەلوردانىڭ ساۋدا دۇكەندەرىنە ساتىپ، مول تابىسقا كەنەلىپ وتىر. كەلەشەكتە اۋقىمدى بودەنە فەرماسىن اشۋعا نيەتتى.

باعلان سارباسوۆ، كاسىپكەر:

- وسى بودەنەمەن اينالىسىپ جاتقانىمىزعا 4 ايداي بولدى. كاسىپ باستاپ كەتكەن جايىمىز بار. ەرەكشەلىكتەرى مەنىڭ وزىمە جەڭىل بولدى بۇل. اۋىرمايدى ءبىر جاعىنان، تەك تاماعىن، سۋىن بەرىپ وتىرسان بولدى. جۇمىرتقاسىن كۇندەلىكتى ءوزى بەرىپ وتىرادى. ءوزىمنىڭ كوڭىلىمنەن شىعىپ وتىر.

بۇگىندە كاسىپكەردىڭ شارۋاشىلىعىندا بودەنەنىڭ 4 ءتۇرى بار. ءبىرى جۇمىرتقانى جاقسى بەرسە، ەندى بىرەۋى ەتتى. بودەنە ورتاشا ەسەپپەن ءار 16 ساعات سايىن جۇمىرتقالايدى. قازىر ءونىمنىڭ نارىقتاعى قۇنى 40 تەڭگەدەن كەم ەمەس. ال ەتىنىڭ كەلىسى 4 مىڭنان اسادى. باعاسى قىمبات بولعانمەن، وعان دەگەن سۇرانىس جوعارى.

باعلان سارباسوۆ، كاسىپكەر:

- مەن ءوزىم قالادا تۇرامىن. قالادان كەلەمىن، جەم، سۋىن بەرەمىن. كەشكە تاعى كەلىپ جەم، سۋىن بەرەمىن. جۇمىرتقاسىن جيناپ الامىن. اپتاسىنا 2 رەت كەيدە 1 رەت استىن تازالاپ تۇرامىن. ءوز كاسىبىنىڭ جەڭىل جاعىن تاپساڭ بولدى عوي.

ماماندار بۇل ءونىمدى تۇتىنۋ ارقىلى قاتەرلى ىسىك پەن قانازدىق، گينەكولوگيالىق اۋرۋلاردان ايىعۋعا بولاتىنىن ايتادى. باستىسى اش قارىنعا جەمەۋ قاجەت.

ارداق چۋەنبەكوۆا، نۋتريتسيولوگ مامان:

- ورتاشا ەسەپپەن بودەنە جۇمىرتقاسىنىڭ سالماعى 9 گ ر بولسا، وندا ونىڭ قۇرامىنداعى ءنارۋىزدىڭ مولشەرى 1 گ ر- عا جەتە الادى. قۇرامىنداعى ءنارۋىزدار قۇندى ءنارۋىزدار بولىپ ەسەپتەلىنەدى. ويتكەنى قۇرامىندا ورگانيزم ءۇشىن، اسىرەسە ءوسىپ كەلە جاتقان ورگانيزم ءۇشىن الماستىرىلمايتىن امينقىشقىلدارى جاقسى بەرىلەدى. سونىمەن قاتار قۇرامىندا مايدىڭ مولشەرى جاقسى بەرىلەدى. كەلەسى كەزەكتە بۇل دارۋمەندەر مەن مينەرالداردىڭ كوزى. بۇل زاتتار ورگانيزمدەگى مايدىڭ الماسۋىن رەتتەۋگە قاتىسادى، حولەستەريننىڭ دەڭگەيىن رەتتەۋگە قاتىسادى، سونىمەن قاتار جۇرەك-قان تامىرلار اۋرۋىنىڭ الدىن الۋدا جاقسى ىقپال ەتەتىن زاتتاردىڭ ىقپالىندا.

بودەنە جۇمىرتقاسىنىڭ تاۋىق جۇمىرتقاسىنا قاراعاندا كالورياسى كوپ بولادى. مۇنى جەگەن ادامنىڭ يممۋنيتەتتى كوتەرىلىپ، ويلاۋ قابىلەتى جاقسى جۇمىس ىستەيدى. بەلسەندىلىگى جوعارى ەر ادامدارعا اپتاسىنا 6-7 جۇمىرتقادان كوپ جەۋگە بولمايدى.

www.24.kz