بەتاشاردا 4 ميلليون تەڭگە سالعان اقتوبەلىك دەپۋتات تارتىپتىك جازاعا تارتىلدى

اقتوبە قالالىق ءماسليحاتىنىڭ دەپۋتاتى اسلان قايىرعاليەۆتىڭ بەتاشاردا ورتادا تۇرعان سەبەتكە قوماقتى اقشا سالىپ تۇرعان ءساتى قىزۋ تالقىعا ءتۇستى. توي كەزىندە تۇسىرىلگەن ۆيدەودا ونىڭ سول ساتتە 4 ميلليون تەڭگە سالعانىن ايتادى. وسىدان كەيىن كوپشىلىكتىڭ ويى ەكىگە جارىلىپ، شۋ تۋدى. كوپ ۇزاماي اسلان قايىرعاليەۆ الەۋمەتتىك جەلىدەگى پاراقشاسىندا ۆيدەوۇندەۋ جاريالادى.

- بۇل مەنىڭ بالا كەزدەن بىرگە وسكەن جاقىن دوسىمنىڭ تويى. ۆيدەودا بارشا دوستارىنىڭ اتىنان جينالعان سىيلىقتى تارتۋ ءساتى كورسەتىلگەن. جىگىت جولداس بولعان سوڭ سىيلىقتى سالۋ ءساتى ماعان ۇسىنىلدى. بۇل مەنىڭ ءوز قاراجاتىم ەمەس، بارشا دوستاردىڭ اتىنان جينالعان تارتۋ ەدى. سول جەردەگى ءىس-ارەكەتىم، ياعني، اقشانى ساناۋ ءساتى كوزگە وعاش كورىنگەنىن ەندى ءتۇسىنىپ جاتىرمىن. بۇل جەردە ماقتانۋ، نازار اۋدارۋ نيەتىم بولعان ەمەس. جاي عانا دوسىمنىڭ، جاقىن دوسىمنىڭ تويىنداعى قۋانىشتى ەموتسيالىق ءسات قانا بولاتىن. ازامات رەتىندە ايتىلعان سىن-پىكىرلەردى تولىقتاي قابىلدايمىن جانە الداعى ۋاقىتتا مۇنداي ءىس-ارەكەتتەرگە جول بەرمەيمىن، - دەدى اسلان قايىرعاليەۆ ءوز ۇندەۋىندە.

اقتوبە قالالىق ءماسليحاتى وسى وقيعادان كەيىن كوميسسيا وتىرىسىن وتكىزدى.

- اقتوبە قالالىق ءماسليحاتىنىڭ دەپۋتاتتىق ەتيكا جونىندەگى كوميسسياسىنىڭ شەشىمىنە سايكەس قالالىق ءماسليحات دەپۋتاتى اسلان قايىرعاليەۆقا مىنەۋ تۇرىندە جازالاۋ شاراسى قولدانىلدى. كوميسسيا Instagram الەۋمەتتىك جەلىسىندە جاريالانعان بەينەجازبالاردى ەگجەي-تەگجەي زەرتتەپ، ءار كوميسسيا مۇشەسىنىڭ پىكىرىن ەسكەرىپ، وسىنداي شەشىمگە كەلدى، - دەپ حابارلادى اقتوبە قالالىق ءماسليحاتىنىڭ ءتوراعاسى انار دارجانوۆا.

ايتا كەتەيىك، اسلان قايىرعاليەۆ اقتوبە قالاسىنىڭ ماسكەۋ جانە بولاشاق شاعىن اۋداندارى اتىنان سايلانعان دەپۋتات. ول «امانات» پارتياسىنىڭ مۇشەسى ءارى قالالىق ءماسليحاتتاعى ەڭ جاس دەپۋتات.

بۇعان دەيىن حابارلاعانىمىزداي، الاياقتىق جولمەن پايدا تاپقىسى كەلگەن اقتوبەلىك دەپۋتاتتار باس بوستاندىعىنان ايىرىلدى. سوت بەس قاباتتى جاتاقحانانى 8 ميلليون تەڭگەگە ساتىپ الىپ، كەيىن ونى مۇعالجار اۋدانى اكىمدىگىنە ساتپاق بولعان دەپۋتاتتاردى ايىپتى دەپ تانىدى.

اۆتور

التىناي ساعىندىقوۆا