«بەسكە دەيىن ۇلگەر»: ەلىمىزدە مەكتەپ جاسىنا دەيىنگى بالالاردىڭ اتا-انالارىنا ارنالعان موبيلدى قوسىمشا ىسكە قوسىلادى
استانا. KAZINFORM - اتا- انالارعا بالالاردى ەرتە جاستان كۇتۋ جانە دامىتۋ بويىنشا كونسۋلتاتسيالىق كومەك كورسەتۋ ءۇشىن «بەسكە دەيىن ۇلگەر» موبيلدىك قوسىمشاسى ىسكە قوسىلادى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى.
موبيلدى قوسىمشا ۇيدە بالا تاربيەلەپ وتىرعان اتا-انالارعا دەنساۋلىق، تاماقتانۋ، تاربيە، داعدىلاردى قالىپتاستىرۋ مەن دامىتۋ جانە ءوزارا قارىم-قاتىناس قۇرۋ بويىنشا قولجەتىمدى اقپارات ۇسىنادى. قوسىمشانىڭ مازمۇنى الەمدىك ينستيتۋتتاردىڭ نەيروبيولوگيالىق زەرتتەۋلەرىنىڭ عىلىمي دەرەكتەرى نەگىزىندە ازىرلەنگەن جانە ءبىزدىڭ مادەني-تاريحي قۇندىلىقتارىمىز ەسكەرىلگەن.
«قازىرگى ۋاقىتتا قوسىمشا قاراعاندى، شىعىس قازاقستان، قىزىلوردا جانە اقتوبە وبلىستارىنىڭ مەكتەپكە دەيىنگى ۇيىمدارىمەن بىرلەسىپ پيلوتتىق رەجيمدە سىناقتان ءوتىپ جاتىر. ونى تولىق ماسشتابتاۋ قاراشا ايىندا جۇزەگە اسىرىلادى. سونداي-اق ونىڭ مازمۇنى ساباقتارعا ارنالعان يدەيالار مەن پراكتيكالىق كەڭەستەر ۇسىنىلا وتىرىپ، كونسۋلتاتسيالىق ورتالىقتاردا پايدالانىلاتىن بولادى»، - دەپ اتاپ ءوتتى مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى مانار اداموۆا.
ايتا كەتۋ قاجەت، موبيلدى قوسىمشا مەكتەپكە دەيىنگى ۇيىمداردىڭ كونسۋلتاتسيالىق پۋنكتتەرىندە قولجەتىمدى بولادى. اتا-انالار مەكتەپ جاسىنا دەيىنگى بالالاردى تاربيەلەۋ جانە دامىتۋ ماسەلەلەرى بويىنشا تاۋلىك بويى ادىستەمەلىك جانە پسيحولوگيالىق كومەك الا الادى.
بۇعان دەيىن 115 مىڭعا جۋىق بالا «بالاقايلار مەكتەبى» باعدارلاماسى بويىنشا مەكتەپالدى دايىندىقتان وتكەنىن جازعان بولاتىنبىز.
اۆتور
ەلميرا ورالبايەۆا
