پرەزيدەنت: ءار قادامدى جان-جاقتى، مۇقيات ويلاستىرىپ، باتىل ارەكەت ەتۋ كەرەك

استانا. قازاقپارات - 2029-جىلعا قاراي ەكونوميكامىزدىڭ كولەمىن 450 ميلليارد دوللارعا جەتكىزۋىمىز كەرەك. بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى.

«جاڭا ۇكىمەتتىڭ العاشقى كەڭەيتىلگەن وتىرىسىن باستايمىز. ەڭ الدىمەن پرەمەر-مينيستر ولجاس اباي ۇلى بەكتەنوۆتى وسى جوعارى لاۋازىمعا تاعايىندالۋىمەن قۇتتىقتايمىن. ۇكىمەت تابىستى جۇمىس ىستەيدى دەپ سەنەمىن. بۇگىن ءبىز بىلتىر اتقارىلعان جۇمىستى قورىتىندىلايمىز. سونداي-اق، الداعى كەزەڭنىڭ باستى مىندەتتەرىنە توقتالۋىمىز كەرەك. جالپى وتكەن جىلى ەكونوميكامىز 5,1 پايىزعا ءوستى. ەڭ باستىسى ەلىمىزدىڭ دامۋ قارقىنى باسەڭدەگەن جوق»، - دەدى مەملەكەت باسشىسى.

پرەزيدەنت كەشە بۇرىنعى پرەمەر-مينيستر ءاليحان سمايىلوۆقا العىسىن بىلدىرگەنىن ايتتى.

«ءبىراق قازىر جايباراقات وتىرۋعا بولمايدى، سەبەبى الدىمىزدا اۋقىمدى جۇمىس تۇر. سوندىقتان ۇكىمەتتىڭ جۇمىسىنا جاڭا سەرپىن بەرۋ قاجەت. نەگىزگى ماقسات - بارشاڭىزعا بەلگىلى. ءبىز 2029-جىلعا قاراي ەكونوميكامىزدىڭ كولەمىن 450 ميلليارد دوللارعا جەتكىزۋىمىز كەرەك. ياعني، ناقتى مەجە بار. ەندى تەك جۇمىس ىستەۋ قاجەت. بۇل - ەلىمىزدىڭ جالپى ىشكى ءونىمى جىل سايىن كەمىندە 6 پايىزعا ءوسۋى كەرەك دەگەن ءسوز. سونداي-اق، ماكروەكونوميكالىق كورسەتكىشتەرمەن قاتار حالىقتىڭ ناقتى تابىسى دا قارقىندى تۇردە ارتۋى كەرەك. بۇل - وتە ماڭىزدى مىندەت. ءبىر سوزبەن ايتقاندا، بىزگە شىن مانىندە ساپالى دامۋ قاجەت. سوندىقتان ءاربىر قادامدى جان-جاقتى، مۇقيات ويلاستىرىپ، باتىل ارەكەت ەتۋ كەرەك»، - دەدى قاسىم-جومارت توقايەۆ.

قازاقستاندا تۇپكى ءمانى وزگەرىپ كەتكەن قوسىلعان قۇن سالىعىنىڭ ءوزىن رەفورمالاۋ قاجەت.

«ەندى بيۋدجەتتىڭ كىرىس بولىگىنە كەلەيىك. قازىر جاڭا سالىق كودەكسى ازىرلەنىپ جاتىر. بۇل قۇجات ينۆەستورلارعا قولايلى جاعداي جاساۋ مەن بيۋدجەتكە قاجەتتى كولەمدە قارجى ءتۇسىرۋدىڭ اراسىندا كوكەيگە قونىمدى تەڭگەرىم بولۋىن قامتاماسىز ەتۋى كەرەك. الايدا، بيزنەس قاۋىمداستىعىندا بۇل قۇجات، ەڭ الدىمەن، سالىق مولشەرلەمەسىن ءوسىرۋدى كوزدەيدى دەگەن پىكىر قالىپتاسىپ وتىر. قازاقستاندا تۇپكى ءمانى وزگەرىپ كەتكەن قوسىلعان قۇن سالىعىنىڭ ءوزىن رەفورمالاۋ قاجەت. ونى 12 پايىزدان 16 پايىزعا دەيىن كوتەرۋ ماسەلەنى شەشپەيدى»، - دەدى قاسىم-جومارت توقايەۆ.

پرەزيدەنتتىڭ پايىمىنشا، ساراپشىلار قوسىلعان قۇن سالىعىن كوتەرۋ كولەڭكەلى ەكونوميكانىڭ ۇلەسىن ارتتىرىپ، ينفلياتسيانىڭ وسۋىنە اكەپ سوقتىرۋى ىقتيمال دەپ ورىندى پىكىر ءبىلدىرىپ جاتىر.

«بۇل قادام ەلىمىزدىڭ ينۆەستيتسيالىق تارتىمدىلىعىنا دا كەرى اسەر ەتۋى مۇمكىن. بۇرىنعى ۇكىمەت ۇلتتىق قوردان بولىنەتىن ترانسفەرتتىڭ ورنىنا سالىقتى كوتەرىپ، قازىناعا قوسىمشا قارجى تۇسىرەمىز دەگەن ءۋاجدى العا تارتاتىن. جاڭا سالىق كودەكسىن ازىرلەۋ بارىسىنا مەملەكەت باسشىسى رەتىندە مەنىڭ كوڭىلىم تولمايدى»، - دەدى مەملەكەت باسشىسى.

 ۇكىمەت شىعىستاردىڭ ەكونوميكالىق پايداسى بارىنشا جوعارى بولۋىنا باسا ءمان بەرە وتىرىپ، ونىڭ ناقتى باسىمدىقتارىن ايقىنداۋى كەرەك. 

«بيۋدجەت جانە سالىق ساياساتىنىڭ تيىمدىلىگىن بارىنشا ارتتىرۋ قاجەت. سوڭعى بەس جىل ىشىندە بيۋدجەت تاپشىلىعى 11 تريلليون تەڭگەدەن اسىپ كەتتى. سوندىقتان بيۋدجەتتى ءتيىمدى باسقارۋ جانە ونىڭ ولشەمدەرىن نەعۇرلىم دۇرىس بولجاۋ ۇكىمەتتىڭ الدىندا تۇرعان باستى مىندەت بولىپ قالا بەرەدى»، - دەدى مەملەكەت باسشىسى.

پرەزيدەنتتىڭ ايتۋىنشا، قارجى مينيسترلىگى بىلتىرعى تابىس جوسپارىن الدىن الا تولەنگەن وسى جىلدىڭ سالىقتارى ەسەبىنەن ورىنداعانى بەلگىلى. 600 ميلليارد تەڭگە كولەمىندە قوسىلعان قۇن سالىعىن قايتارۋ ۋاقىتشا توقتاتىلدى.

«دەمەك بيۋدجەت ماسەلەلەرى بيزنەستىڭ اينالىمداعى قاراجاتى ەسەبىنەن شەشىلدى. ءالى شەشىمىن تاپپاعان تاعى ءبىر ماسەلە - بيۋدجەتتى ءبولۋ ءتارتىبى. ول ەكونوميكالىق بەلسەندىلىكتى ارتتىرۋعا باعىتتالماعان. قاراجات كۇندەلىكتى ماسەلەلەردى شەشۋگە جۇمسالادى، ستراتەگيالىق ماقساتتار سونىڭ كولەڭكەسىندە قالادى. ۇكىمەت شىعىستاردىڭ ەكونوميكالىق پايداسى بارىنشا جوعارى بولۋىنا باسا ءمان بەرە وتىرىپ، ونىڭ ناقتى باسىمدىقتارىن ايقىنداۋى كەرەك»، - دەدى قاسىم-جومارت توقايەۆ.

اۆتور

رۋسلان عابباسوۆ