بەس دۇركىن وليمپيادا چەمپيونى تەددي رينەر قازاقستاندىقتارعا سالەم جولدادى
پاريج. KAZINFORM - بەس دۇركىن وليمپيادا چەمپيونى تەددي رينەر قازاقستان حالقىنا ريزاشىلىعىن ءبىلدىردى.
تانىمال سپورتشى پاريجدەگى وليمپيادا قارساڭىندا ەلىمىزگە ەكى رەت كەلىپ، 2023-2024 -جىلدارى الماتىداعى دزيۋدو اكادەمياسىندا قازاقستان قۇراماسىمەن بىرگە جاتتىعۋ وتكىزگەن بولاتىن.
ءوز كەزەگىندە دزيۋدو الەمىنىڭ اڭىزى قازاقستانداعى كەزىن ساعىنىشپەن ەسكە الىپ، وتانداستارىمىزعا العىسىن جەتكىزدى.
«قازاقستاندىقتارعا جالىندى سالەم. فەدەراتسيا وكىلدەرىنىڭ شاقىرتۋىمەن مەن بۇل ەلگە ەكى رەت باردىم، جاتتىقتىم. ءار جاتتىعۋ وزىنشە ەرەكشە بولدى. ءسوز سوڭىندا قازاقستان حالقىنا العىسىمدى ايتقىم كەلەدى»، - دەدى ريننەر.
ەسكە سالا كەتەيىك، بۇعان دەيىن وليمپيادا ويىندارىندا قازاقستاندىق بوكسشى نۇربەك ورالبايدىڭ فينالعا جولداما العانىن جازعان ەدىك.
اۆتور
ابىلايحان جۇماشيەۆ
