بەس بىردەي وبلىس ورمانشىلاردىڭ ايلىعىن كوتەرە الماي وتىر - دەپۋتات ساۋالى

استانا. KAZINFORM - ءماجىلىس دەپۋتاتى نارتاي سارسەنعاليەۆ پرەمەر-ءمينيستردىڭ ءبىرىنشى ورىنباسارى رومان سكليارعا ورمانشىلاردىڭ ايلىعى تۋرالى دەپۋتاتتىق ساۋال جولدادى.

«2024 -جىلدىڭ 1- شىلدەسىندە پرەمەر-مينيستر ولجاس بەكتەنوۆ ەلىمىزدەگى ورمان شارۋاشىلىعى جانە تابيعاتتى قورعاۋ مەكەمەلەرى قىزمەتكەرلەرىنىڭ لاۋازىمدىق جالاقىلارىنا ۇستەماقى قوسۋ تۋرالى قاۋلىعا قول قويدى. ورمان جانە تابيعاتتى قورعاۋ ۇيىمدارى قىزمەتكەرلەرىنە ەڭبەكاقى تولەۋ جۇيەسىن، شارتتارى مەن مولشەرلەرىن جەتىلدىرۋ ماقساتىمەن «ازاماتتىق قىزمەتشىلەرگە، مەملەكەتتىك بيۋدجەت قاراجاتى ەسەبىنەن قارجىلاندىرىلاتىن ۇيىمداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» ۇكىمەت قاۋلىسىنا وزگەرىستەر ەنگىزىلدى. قۇجاتقا سايكەس، ورمان ءورتىن ءسوندىرۋ بەكەتتەرىنىڭ، ورمان شارۋاشىلىعى مەكەمەلەرىنىڭ، قورشاعان ورتانى قورعاۋ جانە ورمان ورنالاستىرۋ ۇيىمدارىنىڭ قىزمەتكەرلەرى لاۋازىمدىق جالاقىلارىنا 100 پايىزعا دەيىن ءوسىماقى الۋى كەرەك ەدى»، - دەيدى دەپۋتات.

ونىڭ سوزىنشە اتالمىش قۇجاتتار ورمان ءورتىن سوندىرۋشىلەردىڭ، ءورت ءسوندىرۋ كولىگىن جۇرگىزۋشىلەردىڭ، تراكتورشىلار، راديو وپەراتورلارىنىڭ، ءورت ءسوندىرۋ ماشينالارى مەن اپپاراتتارىن جوندەيتىن شەبەرلەردىڭ، باقىلاۋ مۇناراسىن باقىلاۋشىلاردىڭ ايلىعىن كوتەرۋگە نەگىز بولۋعا ءتيىس ەدى.

«اتالعان قاۋلى قىزىلوردا وبلىسىندا، ارال اۋدانىندا، پاۆلودار، ماڭعىستاۋ، قوستاناي، جەتىسۋ وبلىستارىندا ورىندالمادى دەگەن دەرەك كەلدى. ورمانشىلاردىڭ جازعان ارىزى قولىمدا. ورمانشىلاردىڭ جالاقىسىن كوتەرۋدىڭ جۇگى جەرگىلىكتى بيۋدجەتكە ارتىلىپتى، ولاردا قارجى جوق ەكەن. سالدارى اۋىر، جالاقىنىڭ تومەندىگىنەن جاستار ورمانشى بولىپ قىزمەتكە بارعىسى كەلمەيدى. ورمان بار، ورىن بوس، جالاقى جەتپەيدى. جوعارىدا ايتىلعان ماسەلەلەردى زەردەلەپ، 2024 -جىلدىڭ 1 -شىلدەسىندە قول قويىلعان قاۋلىنىڭ تولىققاندا ورىندالۋىن قاداعالاپ، قازاقستانداعى ورمان شارۋاشىلىعىنداعى مامانداردىڭ لاۋازىمدىق جالاقىلارىنا 100 پايىزدىق ءوسىماقىنىڭ قوسىلۋىن قامتاماسىز ەتۋىڭىزدى سۇرايمىن»، - دەدى نارتاي سارسەنعاليەۆ.

اۆتور

ەسىمجان ناقتىباي