بەس اراب مەملەكەتى دونالد ترامپتىڭ ۇسىنىسىنا قارسى شىقتى
استانا. قازاقپارات- بەس اراب ەلى ا ق ش پرەزيدەنتى دونالد ترامپتىڭ پالەستينالىقتاردى گازا سەكتورىنان مىسىر مەن يوردانياعا كوشىرۋ تۋرالى ۇسىنىسىنا قارسى شىقتى.

بۇل تۋرالى كايردە باس قوسقان ساۋد ارابياسى، قاتار، بىرىككەن اراب امىرلىكتەرى، مىسىر مەن يوردانيانىڭ سىرتقى ىستەر مينيسترلەرى مالىمدەگەن. ولار حالىقارالىق قاۋىمداستىقتى گازا سەكتورىن قايتا تۇرعىزۋ بويىنشا بىرىگىپ ءىس قىلۋعا شاقىردى.
قاتار پرەمەر-ءمينيسترى پالەستينالىقتاردى تۋعان جەرىنەن باسقا جاققا كۇشتەپ كوشىرۋ ايماقتا قاقتىعىس وتىن قايتا تۇتاتادى دەپ ەسكەرتكەن. سونداي-اق اراب ەلدەرى گازا اۋماعىندا يزرايل قونىستارىن سالۋعا نارازىلىق ءبىلدىردى.
ترامپ مالىمدەمەسى و ا ر- دىڭ قور نارىعىن قۇلدىراتتى
وڭتۇستىك افريكا رەسپۋبليكاسىنىڭ ۇلتتىق ۆاليۋتاسى رەند كۇرت ارزاندادى. اكسيالار مەن ۇلتتىق وبليگاتسيالار دا قۇلدىرادى. قور نارىعىنداعى بۇل جاعدايعا دونالد ترامپتىڭ مالىمدەمەسى اسەر ەتكەن.
اق ءۇي باسشىسى بۇل ەلگە قارجىلاي كومەك كورسەتۋدى توقتاتۋعا نيەتتى ەكەنىن حابارلادى. ويتكەنى مۇندا ادام قۇقىقتارى ساقتالمايتىنىن ايتقان. امەريكا وڭتۇستىك افريكا رەسپۋبليكاسىنا 20 جىلدا 8 ميلليارد دوللار قارجىلاي كومەك كورسەتكەن.
24.kz