بريتاندىق جانكۇيەرلەر داستان ساتپايەۆتىڭ الاڭعا ورالۋىن كۇتەدى

جازبا اۆتورى شابۋىلشىنىڭ الداعى كەزدەسۋگە ارنالعان قۇرامعا قوسىلماعانىنا نازار اۋدارىپ، ونىڭ تەزىرەك ساۋىعىپ كەتۋىن تىلەدى.

— ساتپايەۆ جاراقاتىنا بايلانىستى كوماندا قۇرامىنا ەنبەدى. حالىقارالىق ۇزىلىستەن كەيىن قاتارعا قوسىلادى دەپ ۇمىتتەنەمىن. سونداي-اق جاڭا باس باپكەر ماۋسىم بارىسىن وزگەرتە الادى دەپ سەنەمىن. ويتكەنى قازىر كوماندا تومەنگى ليگاعا ءتۇسىپ قالۋ ايماعىندا تۇر، - دەپ جازدى CarefreeYouth.

ايتا كەتەيىك، قازاقستاندىق فۋتبولشىنىڭ قاتاردان تىس قالۋىنا ساننىڭ ارتقى بۇلشىق ەتىنىڭ جاراقاتى سەبەپ بولعان. بۇعان دەيىن «بەرنليدىڭ» باس باپكەرى فابيو چەلەستيني كلۋب فۋتبولشىنىڭ قۇقىعىنا يە «چەلسيمەن» بىرلەسىپ، ونىڭ جاعدايىن باعالاپ جاتقانىن ايتقان ەدى. 18 جاستاعى شابۋىلشىنىڭ ناقتى قاشان الاڭعا ورالاتىنى ازىرگە بەلگىسىز.

چەمپيونشيپتىڭ 14-تۋرى اياسىنداعى ك پ ر- عا قارسى ماتچ لوندونداعى «لوفتۋس روۋد» ستاديونىندا ءوتتى. كەزدەسۋ بۇگىن، 4 -قاراشادا قازاقستان ۋاقىتىمەن 00:45- تە باستالدى.

كەزدەسۋ ناتيجەسى

ماتچتاعى العاشقى گولدى 38-مينۋتتا «بەرنلي» ساپىنان لارجي رامازاني سوقتى. ول دجەيمي ۆاردي بەرگەن پاستان كەيىن الىستان ءدال سوققى جاسادى. ال 65-مينۋتتا الاڭ يەلەرى دجوناتان ۆاران گولىنىڭ ارقاسىندا ەسەپتى تەڭەستىردى. قالعان ۋاقىتتا كوماندالار ناتيجەنى وزگەرتە المادى. كەزدەسۋ 1:1 ەسەبىمەن اياقتالدى.

قازاقستاندىق شابۋىلشى داستان ساتپايەۆ كوماندانىڭ جاڭا باس باپكەرى فابيو چەلەستيني جەتەكشىلىك ەتكەن العاشقى ويىندا دا «پورتسمۋتقا» قارسى الاڭعا شىقپاعان ەدى. ول كەزدەسۋدە «بەرنلي» 0:0 ەسەبىمەن تەڭ ءتۇستى.

بۇل - «بەرنليدىڭ» چەمپيونشيپتەگى قاتارىنان بەسىنشى ءساتسىز ويىنى. بۇعان دەيىن كوماندا سىرت الاڭدا «ۋوتفوردتى» 4:0 ەسەبىمەن جەڭىپ، ماۋسىمداعى العاشقى جەڭىسىنە قول جەتكىزگەن ەدى.

چەلەستيني قازان ايىنىڭ سوڭىندا نيككي حايەننىڭ ورنىنا «بەرنليدىڭ» باس باپكەرى بولىپ تاعايىندالدى. چەمپيونشيپتىڭ 13 تۋرىندا كوماندا 9 ۇپاي جيناسا، ك پ ر- مەن تەڭ تۇسكەننەن كەيىن ەنشىسىندە 10 ۇپاي بار. قازىر كوماندا 22-ورىنعا تۇراقتادى. ەندى كلۋبتىڭ تومەنگى ليگاعا ءتۇسىپ قالۋ قاۋپى بار.

بۇعان دەيىن داستان ساتپايەۆتىڭ قاشان 90 مينۋت ويناۋعا دايىن بولاتىنى تۋرالى جازعان بولاتىنبىز.