بريتاندىق 81 جاستاعى جازۋشى بۋكەر سىيلىعىنىڭ ەڭ ەگدە جاستاعى لاۋرەاتى اتاندى
استانا. قازاقپارات - 2026 -جىلعى بۋكەر سىيلىعىنىڭ يەگەرى بريتاندىق فانتاست-جازۋشى مايكل دجون حارريسون اتاندى. قازىلار القاسى ونىڭ ادامزاتقا تونگەن بولاشاق اپات تۋرالى باياندايتىن The End of Everything («ءبارىنىڭ سوڭى») رومانىن جوعارى باعالادى، دەپ حابارلايدى BBC.
81 جاستاعى حارريسون بۋكەر سىيلىعى تاريحىنداعى ەڭ ەگدە لاۋرەات اتاندى. بۇعان دەيىن بۇل رەكورد 2019 -جىلى 79 جاسىندا ماراپاتتالعان مارگارەت ەتۆۋدقا تيەسىلى بولعان.
ول سونداي-اق بۋكەر سىيلىعىن العان العاشقى عىلىمي فانتاستيكا وكىلى اتاندى.
كوبىنە م. دجون حارريسون دەگەن اتپەن تانىمال جازۋشى 1960 -جىلدارى New Worlds فانتاستيكالىق جۋرنالىندا شىعارمالارىن جاريالاي باستاعان. كەيىن وسى باسىلىمنىڭ ادەبي رەداكتورى قىزمەتىن اتقاردى.
جازۋشى وسى ۋاقىتقا دەيىن 13 رومان شىعارعان. ونىڭ ەڭ تانىمال شىعارمالارىنىڭ قاتارىندا Viriconium («ۆيريكونيۋم») سيكلى، سونداي-اق Light («جارىق») جانە Nova Swing («نوۆا سۆينگ») روماندارى بار.
حارريسون ءوز شىعارماشىلىعىن بەلگىلى ءبىر جانرعا جاتقىزعاندى ۇناتپايدى. سوعان قاراماستان، ونى «عىلىمي فانتاستيكا ادەبيەتىنىڭ الىبى» دەپ اتايدى.
- ول - شىن مانىندە بىرەگەي ويشىل، ءوز جانرىن قالىپتاستىرعان ءارى يدەيالارعا بايىپپەن قارايتىن جازۋشى، - دەدى بۋكەر سىيلىعى قورىنىڭ باسشىسى گەبي ۆۋد.
حارريسونعا سىيلىق اكەلگەن The End of Everything رومانىنىڭ وقيعاسى جاقىن بولاشاقتا ءوربيدى. الەمدى قوعامنىڭ كۇيرەۋىنە اكەلگەن جۇمباق اپات جايلاعاننان كەيىنگى كەزەڭ سۋرەتتەلەدى.
جازۋشىنىڭ ايتۋىنشا، ول وسى اپاتقا دەيىن بولعان وقيعالاردى ەگجەي-تەگجەيلى سيپاتتاۋدان ادەيى باس تارتقان. وسىلايشا وقىرماندار دا شىعارما كەيىپكەرلەرى سياقتى بەلگىسىزدىك پەن باعدارسىزدىق سەزىمىن باستان وتكەرۋى كەرەك.
ەسكە سالا كەتسەك، بىلتىر 2025 -جىلعى بۋكەر سىيلىعىنىڭ جەڭىمپازى بولىپ كانادالىق-ۆەنگريالىق-بريتاندىق جازۋشى دەۆيد سالەي تانىلعانىن جازعان ەدىك. وعان سىيلىق «ءتان» رومانى ءۇشىن بەرىلدى.
