برۋسچاتكا، شىنى ىدىس، كولىك بامپەرى - قازاقستاندا قايتا وڭدەلگەن قالدىقتاردان قانداي ءونىم الىنادى
استانا. KAZINFORM - ۇكىمەت قالدىقتاردى باسقارۋ جوبالارىن قارجىلاندىرۋدىڭ جەڭىلدەتىلگەن تەتىگىن بەكىتتى. ناتيجەسىندە 232,2 ميلليارد تەڭگە سوماعا 94 جوبا ىرىكتەلدى. بۇل تۋرالى ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتىپ بەردى.
ەلىمىزدە شىنى، پلاستيك جانە ماكۋلاتۋرا سياقتى قوقىس تۇرلەرىن قايتا وڭدەۋ كورسەتكىشى تومەن.
«اكىمدىكتەردىڭ مالىمەتىنشە، بىلتىر 2023-جىلى ەلىمىزدە 4,1 ميلليون تونناعا جۋىق كوممۋنالدىق قالدىق جينالعان، ونىڭ 1 ميلليون تونناسى (%24) سۇرىپتالىپ، قايتا وڭدەلىپ، قالعانى پوليگونداردا كومىلگەن. ال 2022-جىلى 4,3 ميلليون تونناعا جۋىق قاتتى تۇرمىستىق قالدىقتىڭ %25 قايتا وڭدەلگەن»، - دەدى مينيستر ۇكىمەتتىڭ بۇگىنگى وتىرىسىندا.
ە. نىسانبايەۆ ەلىمىزدىڭ %80 جۋىق حالقى تۇراتىن قالالار مەن ءىرى ەلدى مەكەندەر قوقىس شىعارۋ قىزمەتىمەن قامتاماسىز ەتىلگەنىن ايتتى.
«39 ءىرى ەلدى مەكەن بويىنشا عانا عارىشتىق مونيتورينگ بىلتىر 5533 رۇقساتسىز قوقىس ءۇيىندىسىن انىقتادى، بۇل قالدىقتاردىڭ ناقتى كولەمى ەسەپكە الىناتىن كولەمنەن الدەقايدا جوعارى ەكەنىن كورسەتەدى»، - دەدى ەكولوگيا ءمينيسترى.
كوممۋنالدىق قالدىقتاردىڭ شامامەن %70 پايدالى فراكسيالاردان تۇرادى، اتاپ ايتقاندا %16 پلاستيك (656 مىڭ توننا)، %11 ماكۋلاتۋرا (451 مىڭ توننا)، %9 شىنى (369 مىڭ توننا)، %37 ورگانيكالىق قالدىقتار جانە %27 باسقا قوقىستار.
«بۇل كورسەتكىشتىڭ وڭىرلەرگە بايلانىستى ايىرماشىلىعى بولۋى مۇمكىن. قالدىقتاردىڭ شىنى، پلاستيك جانە ماكۋلاتۋرا سياقتى نەگىزگى تۇرلەرى بويىنشا قازىرگى قايتا وڭدەۋ قۋاتى تومەن»، - دەدى مينيستر.
پرەزيدەنت قاسىم-جومارت توقايەۆ ينۆەستورلاردى تارتىپ، ءىرى قالالاردا تۇرمىستىق قاتتى قالدىقتاردى قايتا وڭدەۋ زاۋىتتارىن سالۋ تاپسىرماسىن بەرگەن ەدى.
ءمينيستردىڭ ايتۋىنشا، تۇرمىستىق قاتتى قالدىقتاردى قايتا وڭدەپ، دايىن ءونىم الۋدى دامىتۋ ساپالى قايتالاما شيكىزاتتى تالاپ ەتەدى. ول ءۇشىن قايتا وڭدەۋگە دەيىنگى بارلىق تەحنولوگيالىق وپەراتسيالاردى، ياعني جيناۋ، تاسىمالداۋ جانە سۇرىپتاۋدى رەتكە كەلتىرۋ قاجەت.
«ۇكىمەت قالدىقتاردى باسقارۋ سالاسىنداعى جوبالاردى قارجىلاندىرۋدىڭ جەڭىلدەتىلگەن تەتىگىن بەكىتتى، ول - قوقىس تاسيتىن كولىكتەردى ساتىپ الۋعا، سۇرىپتاۋ جەلىلەرىن جانە قايتا وڭدەۋ قۋاتتارىن سالۋعا باعىتتالعان. قارجىلاندىرۋ ونەركاسىپتى دامىتۋ قورى ارقىلى 3 جىلدان 15 جىلعا دەيىنگى قارىز بەرۋ مەرزىمىن جانە %3 سىياقى مولشەرلەمەسىن قاراستىرادى. ءۇش جىلعا شامامەن 200 ميلليارد تەڭگە قاراجات بولىنەدى»، - دەدى ە. نىسانبايەۆ ۇكىمەتتىڭ بۇگىنگى وتىرىسىندا.
مينيسترلىكتىڭ جانىنان قۇرىلعان جوبالىق توپ بارلىق اكىمدىكتەرمەن جانە سالالىق بيزنەس وكىلدەرىمەن كەڭەستەر مەن كەزدەسۋلەر وتكىزگەن.
«جوبالاردى قاراۋ كەزىندە وڭىرلەردەگى كوممۋنالدىق قالدىقتار جاعدايىن تالداۋعا جانە پروبلەمالاردى جۇيەلى شەشۋ تۇرعىسىنان جوبالاردىڭ تيىمدىلىگىنە كوڭىل بولىنگەن. ناتيجەسىندە 232,2 ميلليارد تەڭگە سوماعا 94 جوبا ىرىكتەلدى. جوبالاردى جۇزەگە اسىرۋ ناتيجەسىندە برۋسچاتكا، ليۋكتەر، قوقىس باكتارى، شىنى ىدىستار، سترەيچ پلەنكالار، كولىك بامپەرلەرى سياقتى حالىقتىڭ باسقا دا تۇتىنۋ تاۋارلارى شىعارىلادى»، - دەدى ەكولوگيا ءمينيسترى.
ايتا كەتەيىك، قازاقستاندا تۇرمىستىق قالدىقتىڭ 1 ميلليون تونناسى عانا قايتا وڭدەلەدى.
اۆتور
ايجان سەرىكجان قىزى
