برازيليادا سۋدىڭ جىلىنۋىنان 100-دەن استام دەلفين قىرىلىپ قالدى

برازيليادا قاتتى قۇرعاقشىلىق پەن سۋ تەمپەراتۋراسى رەكوردتىق دارەجەگە دەيىن، كەي جەرلەردە 39 سەلسي گرادۋسقا (فارانگەيت بويىنشا 102 گرادۋس) دەيىن كوتەرىلىپ، جۇزدەن استام دەلفين ءولدى، دەپ حابارلايدى قازاقپارات اگەنتتىگى CNN باسىلىمىنا سىلتەمە جاساپ.

дельфин
Фото: Фото: André Zumak/Mamirauá Institute

برازيليا عىلىم مينيسترلىگى قارجىلاندىراتىن زەرتتەۋ ورتالىعى - ماميراۋا ينستيتۋتىنىڭ دەرەگى بويىنشا، كەيىنگى جەتى كۇن ىشىندە تەفە كولىنىڭ جاعاسىنان 100-دەن استام دەلفيننىڭ ولىگى تابىلعان (تەفە كولى - امازونكانىڭ وڭ جاق تاراۋى سانالاتىن تەفە وزەنىنىڭ ساعاسىنداعى ۇلكەن سۋ ايدىنى) .

ينستيتۋت وسىنشالىقتى كوپ دەلفيننىڭ ءولۋى - وتە سيرەك قۇبىلىس ەكەنىن ايتىپ، وعان سۋدىڭ رەكوردتىق دارەجەدەگى جوعارى تەمپەراتۋراسى مەن امازونكادا بۇرىن- سوڭدى بولماعان قۋاڭشىلىق سەبەپ بولۋى مۇمكىن ەكەنىن ءمالىم ەتتى.

الەمدەگى ەڭ ءىرى سۋ ارتەرياسى سانالاتىن امازونكا وزەنى قازىرگى كۇنى قۇرعاقشىلىقتان زارداپ شەگىپ وتىر. رەكوردتىق جوعارى تەمپەراتۋرا وزەندەگى باسقا دا فاۋنا وكىلدەرىنە زيان كەلتىرىپ جاتىر.

زەرتتەۋشىلەر مەن بەلسەندىلەر امان قالعان دەلفيندەردى قۇتقارماق نيەتپەن ولاردى لاگۋنا مەن توعاننان وزەننىڭ شەتىندەگى سالقىنداۋ بولىككە جىبەرۋگە تىرىسىپ جاتىر، دەپ حابارلادى CNN Brasil ءبىراق ولاردىڭ مەكەنى الىس بولعاندىقتان وپەراتسيا قيىنداپ كەتكەن.

امازونياداعى قۇرعاقشىلىق ەل ەكونوميكاسىنا دا كەرى اسەرىن تيگىزەدى.

سۋ دەڭگەيى امازوناس شتاتىنىڭ 59 مۋنيتسيپاليتەتىندە ورتاشادان دا تومەن دارەجەگە ءتۇسىپ كەتتى. بۇل جاعداي وزەندەگى كولىك جانە بالىق اۋلاۋ قىزمەتىنە زالال كەلتىرىپ جاتىر.

ەلدە الداعى بىرنەشە اپتادا قازىرگىدەن دە اپتاپ ىستىق بولۋى مۇمكىن، ول دەلفيندەردىڭ تاعى دا قىرىلۋىنا اكەلەدى دەگەن بولجام بار، دەپ حابارلادى CNN Brasil.

اۆتور

بالنۇر قوجاگەلدى

سوڭعى جاڭالىقتار