برازيليا قازاقستان تاپسىرعان «قارا جاشىكتى» وبەكتيۆتى زەرتتەۋگە مۇددەلى - امانگەلدى قۇرمەت ۇلى

استانا. KAZINFORM - بەلگىلى اسكەري ساراپشى امانگەلدى قۇرمەت ۇلى اقتاۋدان 3 شاقىرىم جەردە قۇلاعان Embraer ۇشاعىنىڭ «قارا جاشىگىن» برازيليانىڭ CENIPA ورتالىعىنا تاپسىرۋ تۋرالى شەشىمىنە قاتىستى پىكىر ءبىلدىردى.

- البەتتە، ءبىز اۆياتسيا سالاسىنىڭ مامانى ەمەسپىز. ءبىراق قازىر اقپارات قۇرالدارىندا جاريالانىپ جاتقان مالىمەتتەرگە قاراپ وتىرىپ، قازاقستاننىڭ قابىلداعان شەشىمى دۇرىس-اۋ دەگەن پىكىرگە كەلىپ وتىرمىن. ءيا، Embraer - برازيليالىق كومپانيا ەكەنى راس. ءبىراق ونىڭ كوپتەگەن دەتالى ءار ءتۇرلى ترانسۇلتتىق كونسەرندەردىڭ ءونىمى ەكەنىن دە ەسكەرۋ كەرەك. اتاپ ايتاتىن بولساق، ونىڭ قوزعالتقىشى - امەريكالىق General Electric كومپانياسىنىڭ ءونىمى. سوندىقتان برازيليالىقتار ۇشاقتىڭ «قارا جاشىگىن» زەرتتەگەن كەزدە مىندەتتى تۇردە دىبىس جازۋ قۇرالىنداعى اقپاراتتار مەن تەحنيكالىق كورسەتكىشتەردەگى مالىمەتتەردى جان-جاقتى قاراستىرادى دەپ ويلايمىن. ۇشاقتىڭ قوزعالتقىشىنا بايلانىستى، ءسوز جوق، General Electric- ءتىڭ ماماندارىمەن اقىلداسۋى ىقتيمال. سوندىقتان قازاقستاننىڭ «قارا جاشىكتى» برازيلياعا جىبەرۋىندە ەشقانداي مۇددەلەر قاقتىعىسىن كورىپ تۇرعان جوقپىن، - دەيدى اسكەري شولۋشى.

ونىڭ پايىمداۋىنشا برازيليانىڭ بەيتاراپ پوزيتسيا ۇستانۋىنا ىقپال ەتەتىن باسقا دا فاكتورلار بار.

- قازىر الەمنىڭ كوپتەگەن ساراپشىلارى اقتاۋدىڭ ماڭىندا قۇلاعان ۇشاقتىڭ بورتىنداعى اقاۋلارعا ايرىقشا نازار اۋدارىپ وتىر جانە ونىڭ سىرتقى اسەردىڭ كەسىرىنەن بۇلىنگەنىن كەز كەلگەن ادام بايقايدى. مەنىڭشە، بۇل جەردە برازيليا ءبىرشاما بەيتاراپ پوزيتسيادا بولادى دەپ ويلايمىن. ويتكەنى، كومپانياعا ءوز ونىمدەرىن حالىقارالىق نارىقتا ساتۋ كەرەك. سوندىقتان ولار ءبىرشاما ادىلەتتى شەشىم شىعارادى-اۋ دەگەن جەكە ءوز پايىمىم بار. ەگەر ساياسي ىقپالمەن «ۇشاققا قۇس سوعىلىپتى»، تاعى باسقا دەيتىندەي مالىمەت تاراتاتىن بولسا، وندا كومپانيانىڭ حالىقارالىق نارىقتاعى بەدەل تۇسەدى. مۇنداي وقيعانى زەرتتەۋشىلەر تەك كومپانيانىڭ وكىلدەرى عانا ەمەس، وزگە دە مىقتى ماماندار بار ەكەنىن ەسكەرۋ كەرەك. سىرتقى دەتالدەرگە قاراپ-اق بەلگىلى ءبىر باعا بەرەدى. سول سەبەپتى، Embraer ساياسيلانعان شەشىمگە بارادى دەپ ويلامايمىن، - دەدى ول.

سونداي-اق برازيليانىڭ حالىقارالىق اۆياتسيا تاريحىندا بەلگىلى مولشەردە قارا جاشىكتەردى وقۋدا تاجىريبەسى بارىنا دا توقتالدى.

- وزدەرى ۇشاق ءوندىرىپ وتىرعان مەملەكەت ەكەنىن ەسكەرسەك، ماماندارى جەتكىلىكتى دەگەن پىكىردەمىن. مىسالى، 2024 - جىلدىڭ تامىزىندا برازيليا جاقتا ۇشاق قۇلاعان. ونىڭ ەندى ماركاسى باسقا بولدى، ارينە. سوندا قۇلاعان ۇشاقتىڭ «قارا جاشىگىن» برازيليا ماماندارى اشىپ، ونداعى اقپاراتتاردى جاريالادى. مىسالى، ۇشاق پيلوتتارىنىڭ ءوزارا اڭگىمەسىن جاريالاعان بولاتىن. سوندىقتان بۇل جەردە ولاردى تاجىريبەسىز دەپ باعالاۋعا بولمايتىن شىعار.

ساراپشى قازاقستاننىڭ «قارا جاشىكتى» برازيليانىڭ CENIPA ورتالىعىنا تاپسىرۋ تۋرالى شەشىمىن وڭ باعالاپ وتىر.

- جالپى، قازاقستاننىڭ قابىلداعان شەشىمى ەڭ دۇرىس شەشىم دەپ ەسەپتەيمىن، ءوز باسىم. بۇل جەردە ۇشاق قازاقستان اۋماعىندا قۇلادى دەگەنمەن، يەسى - ازەربايجان. قازا بولعانداردىڭ كوبى - ازەربايجان ازاماتى. وكىنىشكە قاراي، وتانداستارىمىز دا بار. دەگەنمەن، اقى يەسى ازەربايجان بولعاندىقتان ءارى قاراي ماسەلەنىڭ قالاي زەرتتەلەتىنىنە سول رەسمي باكۋدىڭ جانە برازيليانىڭ، ماسكەۋدىڭ ءوزارا ىقپالداستىعى اسەر ەتەتىن شىعار.

مەنىڭشە، ەندى جاسىراتىن ەشتەڭە قالعان جوق. كوپ مامان وقيعانىڭ قانداي بولعانىن كەمىندە 80 پايىز دالدىكپەن ايتىپ وتىر. «زىمىران سوققىسى بولۋى مۇمكىن» دەگەن دە نۇسقا اشىق ايتىلىپ جاتىر. سول سەبەپتى، Embraer ماسەلەنى جىلى جاۋاپ قويا المايتىن شىعار دەگەن ويدامىن.

ال قازاقستاننىڭ ۇستانىمىنا كەلسەك، ەندى بۇدان كەيىنگى شەشىمدەر تىكە بىزگە قاتىستى ەمەس. ويتكەنى، ۇشاق ءبىزدىڭ جەرگە قۇلادى دەگەنمەن، ونىڭ زاقىمدانۋىندا نەمەسە قانداي دا ءبىر كەدەرگىگە ۇشىراۋىندا قازاقستاننىڭ ەشقانداي قاتىسى جوق. ءبىز اۋە كەڭىستىگىمىزدى بەرگەنبىز جانە قاجەت كەزىندە ادامداردى قۇتقارۋعا بارىمىزدى سالدىق. تۇتاس قازاقستان حالقى جۇمىلدى دەۋگە بولادى، - دەدى امانگەلدى قۇرمەت ۇلى.

بۇعان دەيىن حابارلاعانىمىزداي، يكاو ۇسىنىمدارىن ەسكەرە جانە ازەربايجان مەن رەسەيدىڭ اۆياتسيالىق بيلىك وكىلدەرىمەن كەڭەسە وتىرىپ، ق ر كولىك ءمينيسترى مارات قارابايەۆ باسقاراتىن اۆياتسيالىق وقيعانى تەرگەۋ جونىندەگى كوميسسيا بورتتىق وزدىگىنەن جازعىشتاردى (قارا جاشىكتەردى) Embraer اۋە كەمەسىن شىعارۋشى برازيليانىڭ اۆياتسيالىق وقيعالاردى تەرگەۋ جانە الدىن الۋ ورتالىعىنا (CENIPA) جىبەرۋ تۋرالى شەشىم قابىلدادى.

ەسىمجان ناقتىباي

اۆتور