بۋرابايدا اعاش بۇتاقتارىنان 15 مىڭداي شۇبەرەك شەشىلدى
استانا. KAZINFORM - «بۋراباي» مەملەكەتتىك ۇلتتىق تابيعي پاركى ينسپەكتورلارى مەن وقۋشىلار اعاش بۇتاعىنا بايلانعان 15000-نان استام شۇبەرەك، پاكەتتەردى شەشىپ الدى.

«بۋراباي» م ۇ ت پ بۋراباي ورمانشىلىعىنىڭ ينسپەكتورلىق قۇرامى ساكەن سەيفۋللين اتىنداعى جالپى ءبىلىم بەرەتىن مەكتەپتىڭ جوعارى سىنىپ وقۋشىلارىمەن بىرلەسىپ ۇلتتىق پاركتىڭ اۋماعىندا «تىنىستا، تال- شىبىق!» اكسياسىن وتكىزدى.
كۇنى بويى ولار «ايۋتاس» جارتاسىنىڭ ماڭىنداعى قاراعاي مەن قايىڭ بۇتاقتارىن تۋريستەر تاققان پلاستيك پاكەتتەردەن، ماتادان، سەلليۋلوزادان جانە باسقا ماتەريالداردان تازالادى. بارلىعى 15000-نان استام بايلاۋ شەشىلىپ الىندى.

«ءىس-شارانىڭ ماقساتى جاسىل جەلەكتى قورعاۋ. ادامداردىڭ ىرىمداپ تاققان بايلاۋلارى وسىمدىكتەردىڭ ەركىن وسۋىنە كەدەرگى كەلتىرەدى. ءار ءتۇرلى ماتەريالداردان جاسالعان زاتتار اعاشتاردىڭ ءوسۋى مەن دامۋىن قيىنداتادى، جارىق پەن كومىرتەگىن قابىلداۋىنا جول بەرمەيدى. اعاش بۇتاعىنداعى ماتەريالدار ىلعالدى ءسىڭىرىپ الادى، بۇتاقتاردى زاقىمدايدى. سونىمەن قاتار، پلاستيكتەن بايلاۋلار وتە باياۋ ىدىرايدى، ەكوجۇيە ءۇشىن ۇزاق مەرزىمدى پروبلەما تۋعىزادى»، - دەپ ءتۇسىندىردى ورمان شەبەرى ايبەك اقجۇنىس.
اكسيا قاتىسۋشىسى، 10-سىنىپ وقۋشىسى رادمير العازين دە ءوز اسەرلەرىمەن ءبولىستى.
«ءبىز تەك ءبىر قاراعايدان جارتى قاپقا جۋىق بايلاۋلاردى الىپ تاستادىق. مەنىڭ بۇل پروبلەمانىڭ ايتارلىقتاي وزەكتى ەكەنىنە تاڭعالدىم! بارشانى ورماندا تازالىق ساقتاۋعا جانە تابيعاتتى قورعاۋعا شاقىرامىن. وتىنەمىن، بۇتاققا ەشتەڭە ايلاماڭىزدار! ءبىزدىڭ بولاشاعىمىز قورشاعان ورتاعا دەگەن كوزقاراسىمىزعا بايلانىستى ەكەنىن ءبارىمىز ءتۇسىنۋىمىز كەرەك»، - دەيدى ول.
«تىنىستا، تال- شىبىق!» اكسياسى جىل سايىن وتەتىنىن ايتا كەتەيىك. بۇل ءىس-شارا اعاشتاردىڭ بۇتاعى مەن ءتۇبىن قوقىستاردان تازارتۋعا كومەكتەسىپ قانا قويمايدى، سونىمەن قاتار جاستاردىڭ نازارىن ۇلتتىق پاركتە تابيعاتتى ساقتاۋ ادەبىنە دە نازار اۋدارادى.
اۆتور
ەربول جانات