بۋرابايدا زەرەك ءارى ەستە ساقتاۋ قابىلەتى جوعارى قۇس كوزگە ءتۇستى
استانا. KAZINFORM - بۋراباي ورمانىندا تۋريستەر سامىرسىن قۇسىن كەزدەستىرگەن.
ۇلتتىق پاركتە سەرۋەندەپ جۇرگەن تۋريست Park House ماڭىنداعى ورماندا سامىرسىن قۇستى بايقاپ قالعان. ءبىر قىزىعى، قۇس ادامداردان اسا ۇرىكپەي، ءوزىن ەركىن ۇستاعان.
سامىرسىن - قارعالار تۇقىمداسىنا جاتاتىن، زەرەكتىگىمەن جانە ەستە ساقتاۋ قابىلەتىنىڭ جوعارىلىعىمەن ەرەكشەلەنەتىن قۇس. كۇزدە ول قىسقا ازىق جيناپ، تۇقىمدار مەن جاڭعاقتاردى ءارتۇرلى جەرگە جاسىرادى. تاڭعالارلىعى، قار باسىپ قالعان كەزدە دە جاسىرعان ازىعىنىڭ ءبىرازىن تاۋىپ الا الادى.
سامىرسىننىڭ تابيعاتتاعى ءرولى دە ەرەكشە. ول قىلقانجاپىراقتى اعاشتاردىڭ تۇقىمدارىن تاراتۋعا كومەكتەسەدى. قۇستىڭ ۇمىت قالعان قورىنداعى تۇقىمدار قولايلى جاعدايدا ءونىپ، جاڭا اعاشتاردىڭ وسۋىنە ىقپال ەتۋى مۇمكىن.
وسىنداي كۇتپەگەن كەزدەسۋ بۋرابايدىڭ جانۋارلار دۇنيەسى قانشالىقتى باي ەكەنىن تاعى ءبىر مارتە كورسەتەدى. ەڭ باستىسى — ورمان قۇستارىن ۇركىتپەي، قورەكتەندىرۋگە تىرىسپاي، تابيعي تىرشىلىگىنە كەدەرگى كەلتىرمەي باقىلاۋ.
ايتا كەتەلىك ەرتىس ورمانىندا بۇلان كوبەيگەنى تۋرالى جازعان ەدىك.
