بۇقتىرمانىڭ سۋ دەڭگەيى كوتەرىلىپ، اۋىل حالقى ۇيلەرىن سۋ الا ما دەپ الاڭداۋلى
وسكەمەن. KAZINFORM - شىعىس قازاقستان وبلىسى كۇرشىم اۋدانىندا بۇقتىرمانىڭ سۋ دەڭگەيى كوتەرىلىپ، اۋىل حالقى ۇيلەرىن سۋ الا ما دەپ الاڭداۋلى.
سوڭعى كۇندەرى الەۋمەتتىك جەلىلەر مەن ب ا ق- تا كۇرشىم اۋدانى امانات اۋىلىنىڭ حالقى ۇيلەرىن سۋ الادى دەپ ۇرەيلەنىپ جاتقاندارى تۋرالى اقپارات تارادى.
وندا بۇقتىرما سۋ قويماسىنىڭ دەڭگەيى كوتەرىلىپ، اۋىل ىرگەسىنە دەيىن جەتكەنى، تۇرعىنداردىڭ ءبىرىنىڭ قوراسىنىڭ جارتىسى قۇلاعانى ايتىلعان.
انىق-قانىعىن ءبىلۋ ءۇشىن Kazinform ءتىلشىسى كۇرشىم اۋدانى بالىقشى اۋىلدىق وكرۋگىنىڭ اكىمى ەرجان تىلەۋبايەۆقا حابارلاسىپ كوردى.
«بيىل بۇقتىرمانىڭ سۋ دەڭگەيى كوتەرىلدى. ءبىراق تۇرعىن ۇيلەرگە ەش قاۋىپ جوق. سول جاققا بارىپ ولشەدىك. سۋ مەن ەڭ شەتكى ءۇيدىڭ اراسى 37 مەتر. قوراسى زاقىمدالعان ازاماتپەن اۋدان اكىمى كەزدەستى. ءبىراق زاڭ بويىنشا تۇرعىننىڭ قوراسى نەمەسە باسقا دا كاسىپكەرلىك نىسانى توتەنشە جاعدايدان بۇلىنسە وعان وتەماقى بەرىلمەيدى. وتەماقى تەك تۇرعىن ۇيگە قاراستىرىلعان. اۋىل تۇرعىندارىنا ءتۇسىندىرۋ جۇمىستارى جۇرگىزىلدى»، - دەيدى ول.
اۆتور
تالعاتجان مۇحامەتبەك ۇلى
